Avropa Şura Az.R-ədə siyasiə məhbuson problem muzakirə kardışe.
Yanvari 30-minə ruji Avropa Şura Parlamentə Assambleya de Az.R -ədə siyasiə məhbuson əlağədar ğətnamə ğəbul kardışe.
İnformasiya Aqentiyyəti pevolo kardə məlumatədə votə bedə ki, ım sənədi muzakirəonədə deputaton votəşone ki, Boku hokumət Avropa Bəşəri Huğuğon Məhkəmə ğəraron icra kardedəni, huğuğə mudafiəkaron, jurnaliston, siyasiə akriviston fəaliyyət rə-rə əvoni bə zindon dəğande səbəb bedə, icra hakimiyyəti məmuron bə məhkəmə koon mudaxilə kardedən, bə jıqo vəziyyəti ro doe əbıni. Az.R numayəndon bə ğətnamə layihə etiraz kardəşone, Səməd Seyidovi votəşe ki, Azərbaycanədə hiç vaxt siyasiə məhbus bıə ni, ım layihə hozo kardə məruzəkaron ğərəzkarin, Azərbaycani demokratikə jimoni çe ğəsdo bə şubhə ji dənoe pidəşone. Azərbaycanıjə deputaton bə layihə təsiyə kardə 3 qılə təklif doəşone, əmo de Assambleya deputaton veyə əksəriyyəti sədo ım təklifon ğəbul bıə ni.
Məruzəkar İslandiya deputat Evarsdottir`i bə Səmədovi ittihamon cəvobədə votışe ki, "Şımə bə tənğidon durum nahardeku az sərost fameme ki, Azərbaycanədə siyasiə məhbuson hestin".
AŞPA ğəbul kardə ım ğətnamədə de jurnalist Əfğan Muxtarlı, "Mısılmonon İbemon"ə hərəkati lideron Taleh Bağırzadə və Abbas Huseynovi , Səid Dadaşbəyli əlağədar cinayətə koon bə yod dəğandedən. Bə 2018-minə sori Qəncə hadisəonən ım sənədədə vırə doəşone, ğeyd kardəşone ki, bə muttəhimon doə işqəncəon, çəvon məhkəmə ğeyri obyektiv barde nişon dodə ki, de ım koy məhkum bıə odəmon siyasiə məhbusonin. Assambleya Boku hokumətiku xahiş kardəşe ki, de siyasi motivon məhkum bıə məhbuson koy sənibəton diə bıko, məmləkətədə siyasiə məhbuson problemi ikərəti həll bıkardo.
İslandiyavojə deputati həmən ğeyd kardəşe ki, AŞPA uzv bıə keşvərədə siyasiə məhbuson mevcud bıe məğbul ni, Boku hokumət dırozə muddəte ki, bə Avropa Bəşəri Huğuğon Məhkəmə ğəraron məhəl nodəni, ım daima jıqo dəvom karde nibəzıne, əv bəştə səpe peqətə ehdədarion əməl kardənine. Ey votəşe ki, bə Azərbayçani hokuməti hərəkəton nəzarət bəkarde , bı barədə bə Parlamentə Assambleya daima məlumat bədo.
