Almaniyadə Boku hokuməti korrupsiya əməlon ifşa kardışone.
Almaniya Bundestaqi ıştə 2 qılə depurat – Eduard Lintner və Karin Strenzini deputatə ənəpexəviəti huğuğ ləğv kardəşe. Frankfurt şəhəri prokuratura çəvon ofisonədə təftiş barde ro sanksiya doəşe. Im xəbə “Azadlıq.info” bə Almaniya “Bild” rujnomə istinadən bə çəmiyyəti rosniəşe.
Bımi bənə səbəbi çəvon bo avtoritar Az.R rejimi lobbiçiəti karde, Boku hokumətiku kulli miğdarədə rışvə se nişon doə bedə. Prokuratura bə ım 2 qılə deputati həmən ıştə həmkarə co deputaton de rışvə bə dast se, əvoni bə Əliyev hokuməti bardə antidemoktatik siyasəti dastək doe təhrik kardeədə ittiham bə nav dodə.
Ğeyd karde lozime ki, har dı qılə deputat AŞPA-də fəaliyyətşon bıə, Az.R bardə siyasətşon ım təşkilatədə daima mudafiə kardə. Federal Daxili Koon Vəzarəti sabiğ devlətə katib Linteri 2008-2016-minə soron dırozi Boku tərəfiku 4 milyon avro, Strenzini isə AŞPA-də ko kardə vaxtonədə 22 həzo avro seədə qınokar zınedən. Linteri de ım puli vasitə Parlamentə Assambleya deputaton bə Azərbayçani bardə siyasəti dastək doə koy çəlb karde barədə şubhəon hestin. Boku hokumətiku rışvə seədə və çırkinə pulon şışteədə şubhəninə 3-minə odəmən heste, əmo istintağə orqanon hələ ki, çey nomi faş kardedənin.
Avropa Bəşəri Huğuğon Məhkəmə yanvari 30-minə ruji de Az.R-ku şikayəti əlağədar ıştə 8 qılə ğəror elan kardəşe. Bə ım ğəroron əsasən Boku hokumət bə şikayətkaron tosə 122 həzo avro cərimə avjor kardənine. Im odəmon restədə Erməniston, Norveç və Ukrayna şəhrıvandonən hestin.
Avropa Məhkəmə həmən 2019-minə sori ıştə fəaliyyəti barədə səkıştə rəğəmon elan kardəşe. Çe ım məlumatonku məlum bedə ki, əvon dəvardə sori bə Az.R dair 21 qılə qəror bekardəşone. Im ğəroron əsasən de azadiə və ədalətinə muhakimə huğuğon darışte əlağədar bıə. Umumən isə Avropa Bəşəri Huğuğon Məhkəmə orəxnə 20 sorədə ki, Az.R cey uzve, Boku hokuməti ğeyri-ğanuniə hərəkəton barədə 178 qılə ğəror bekardəşe, haliyədə ım Respublika bı koədə çe Avropa Şura devləton restədə 12-minə vırədə ğəror qətedə.
