Az.R -ədə polis dızdon himayə kardedə.

Az.R polisi dızdon himayə karde barədə Respublika Mass-mediyaonədə rə-rə fakton dərc bedən. Əmo ım publikasiyaon hiç qıley nəticə dodəni, məqəvuji Boku hokumət de jıqo beaburinə vəziyyəti mubarizə barde holədə ni.

Bı rujonədə “ Tolışıston.com ” sayti xəbə doşe ki, bə deputatəti namizəd Ziyafət Əskərovi Ostoro rayoni Şahağac diədə de əvıjnon didorədə muasirə devləton tarixədə mumkun nıbə qıley ğəribcurə hadisə vağeə bıe. Diy əji Əsədov Fəyaz Mehdi zoə bə Əskərovi şikayət doşe ki, çey kədə dızdi kardəşone, əv həmonə dızdi zınedə, ıştə kəyku  dızdə  molon çey kədə qətəşe,  çey həxədə bə polisi şikat kardəşe, əmo polis ım hadisə tədğiğ kardedəni. Əskəroviən bə polisi dəstur doəşe ki, ım odəmi problemi həll blko. Polisiən çey maşkinə ruji ım zərərdidə bə 10 sutka muddət bə zindon dənoəşe.

Meydan TV-ən yanvari 29-ədə Kurdəmir rayoni Ğərəsu di heyvandarə əhali çe polisi dərəbəqiətiku şikayət bə cəmiyyəti nəzə rosnişe. Əvon bə muxbiri votəşone ki, 4 manqe, kəvşəno çəvon molon dızdidən. Bı muddətədə çəvon 10 qılə mol-mələ dızdiəşone. Bə rayoni polis şebə, bə Daxili Koon Vəzarəti çanədə şikayət kardəşone, tosə ısət polis ım dızdon peydo karde ro hiç qıley hərəkət nişon dodəni. Zərərdidə Xeyrulla Qocayev votedə ki, “iminə mol dızdiə hadisə noyabri 6-ədə bıe, bə polisi şikat kardıme, hiç tədbir nıvindoşone, çəyo dekabri 24-ədə çımı qıley zandəqo, 29-ədə dı qılə qomuş dızdişone. Diy co sakinon molonən dızdidən. Dızdon kii bıeən zınedəmon, əmo polis bımi əncom kəşedəni.”

Fuzuli rayoni Alxanlı diy sakin bə Hidayət Səfərovi səən jəqo qıley hadisə omə: çey kədə 20 həzo mənot pul dızdiəşone. Şəkbardə odəmiən zınedə, bı həxədə bə polisi şikayətşən kardə, 3 sore ki, polis quya təhğiğat bardedə, tosə ısət həmonə odəmi bə məsuliyyət cəlb karde ro hiç qıley tədbir vindedəni.

De Ziyafət Əskərovi vindemonədə vağeə bıə orəxnə hadisə jıqo qıley fakt bə subut rosnişe ki, Az.R polis de dızdon dastbədast və xamboze, bə səbəbən əvoni himayə kardedə.