Şamaxı rayonədə bə sufion dair tarixiə abidə məhv bedə.

Çe Şamaxı şəhrestoni Kələxonə di rayoni mərkəziku 6 km məsafədəy. Çey ro bərbad vəziyyətədə bıe bə i tərəf bımando, əraziədəş bə sufion dair 8 qılə turbə ki, miyonə əsronədə inşa bıən, vi–vay nıbe səbəbiku vılo bedə.

Tarixşunas Faiğ Nəsibovi fikir jıqoe ki, ım abidəon tarix bə 14-16-minə əsron şedə beşedə, bə devləti tərəfo muhafizə bıə abidəon siyahi daxıl kardəşone, haliyədə bə təmiri eştiyacşon heste. Isət hic qıley devlətə onoemoni bə çəvon tənəvəc nımande səbəbiku Şirvan vilayəti ım molyətinə tarixi abidon vılo bedən. Nəsibovi ımən bə yod vardəşe ki, hələ 1703-minə sori niderlandə səyyah Kornels de Bruin ım kompleksi barədə məlumat doəşe. Bə vaxt turbəon miğdar 9 qıləybən, dılətonoşon, qıleyədə 5, co qıleyədə 3 qılə ğəb hestebən. Haliyədə 1 qılə turbədə sığə kitabə mevcude, çey səpe nıvıştəşone ki, “iyo Çilqəri şeyx İsrafili nəsli əvlod İbrahimi zoə Əmir Əhməd dəfn kardə bıə. Sərkar Əmir Əli zoə Əbduləzim. 1070-minə sor”. Demiən məlum bedə ki, ım turbə de miladi tarixi 1663-64-minə sorədə inşa kardəşone. Sərkar Əbduləzim çey inşa kardə usto nome.

Diy sakinon votedən ki, ım turbədə muğəddəsə şəxson dəfn bıən. Nafko odəmon iyo bə ziyarət əvoyn, nəzır əden, ğıbon oəbırin. Bə cıvrey doon terə dəbastin. Turbəon ısətnə vəziyyət hiçən ğənaətbəxş ni, divoonədə və kumədəşon təkə, deformasiya, həviə vıron, erıziəyon hestin. Qıley turbə kumi 1 hissə rıjiə.

Mədəniyyətə Vəzarəti tono Mədəniə İrsi Muhafizə və Bərpa Xidməti mətbuatə katibi bə “Sputnik-Azərbaycani” məlumat doəşe ki, ım turbə kompleksi bərpo-konservasiya koon bə ayəndə soron investisiya proqram daxil kardəşone.