Jurnalist Polad Aslanovi məhkəmə bino bıə.

Fevralə manqi 3-minə ruji Boku Qonə Cinayəton Məhkəmədə “Xəbərman” sayti sərredaktor Polad Aslanovi muhakimə bino bıe. Məhkəmə sədr hakim Faiğ Qəniyeve.

Həm Aslanov, həmən çey vəkilon bə hakimi  etiraz kardışone, votışone ki, əv hakimətiku bə nav 1998-2013-minə soron çe Milli Əmniyyətə Vəzarəti mustəntiğ bıə. Çey ısətən de Devlətə Əmniyyətə Xidməti əlağə və munasibətonış heste, bı səbəbən əv ım muhakimə ədalətin barde nibəzıne. Əmo məhkəmə çəvon ım vəsadət təmin nıkardışe.

Məhkəmədə Polad Aslanov şişə ğəfəsədə bıe səbəbiku zalədə çey sədo məse bedənıbe. Ey hakimiku xahiş kardışe ki, bey mikrofon bıdo, hakimi çey ım xahişşən rədd karde. Çimi bə peş Aslanovi jimoni həmro Qulmirə xanımiən ıştə noroziəti ifadə kardışe. Imən çey de hakimi arədə bə hesıbesi vardışe bekardışe. Hakimi məhkəmə zali tey kardə ğəror isə tamam bə  mərəşulə səbəb bıə. Poladiən bımi etiraz kardəşe ki, əqər huğuğə mudafiəkaron və jurnaliston bə məhkəmə iclas oqırdıniə nıbon əvən məhkəmə prosesədə iştirak nibəkarde. Jıqo vəziyyətədə hakim məcbur mandə ki, əvoni bə salon oqordıno. Əmo bə muttəhimi mikrofon nıdoşe.

Çəyo hakimi məlumat doəşe ki, zərərdidə Dəyanət Babayev ki, quya Aslanov bey rıjd omə ki, ey bəkışte, bəştə səhhəti qorə məhkəmə iclasonədə iştirak nibəkarde. Imən bə mudafiə tərəfi ciddiə etirazi səbəb bıə, əmo hakimi çəvon ım, həmən co vəsadəton hiç qıləyon təmin kardəş ni. Məhkəmə iclasi orəxədə Polad Aslanovi elan kardəşe ki, jıqoşə bəştə jurnalistə fəaliyyəti orəx dodə, bə siyasiə fəaliyyət bino kardedə. Bə Milli Şura rəhbəriyyəti muraciətən votəşe ki, bə ım Şura uzv bıe pidəşe.

Məhkəmə nubətinə iclas fevrali 10-minə ruji dəbəvarde.

Əlavən vote lozime ki, jurnalist Polad Aslanov de bə devləti xəyanət ittihami dəvardə sori iyuni 12-də dəstqir kardəşone. Əmo əv ımi rədd kardedə, votedə ki, ıştə saytədə Devlətə Əmniyyətə Xidməti həmkaron bə ziyarət şə zəvvaronku rışvə tələb karde barədə məğaləon nıvışte səbəbiku çeyku de ım bıhtonə maddon ğisos seşon pidə.