Аz.R-də de koronovirusi çoko mubarizə bardedən.

Çinədə koronovirusi xəbə beşə bə peş yanvari 28-ədə Az.R Vəziron Kabinetədə muşavirə təşkil bıe. Im virusi bə məmləkət daxil bıe vəy se ro ğəror doşone ki, marzi ovaştə məntəğəonədə zumandə koə rejim onon. Çiniku omə odəmon mutləğ tibbi muayinəku dəvunion və peşonə vaxtonədə əvoni tibbi nəzarəti jitono oqəton.

Bə Meydan TV fevrali 5-ədə doə xəbə əsasən Səhiyyə Vəzarəti rəsmən məlumat doəşe ki, haliyədə bə  Klinik Tibbiə Mərkəzi sirayətkardə noxəşinon şebə 7 nəfər çe Çino oqərdə azərbaycanıjə şəhrıvand dəğandəşone. Əvon ıştə səhhətiku şikayət nişone. Karantin muddət orəxə bə peş əvoni bə kə vabədon.

Əmo əslən Minqəçevirıj Şahin Məmmədli bo Meydan TV qəp jəşe ki, əv deştə kinə və de çey şuə 5 ruje ki, çe Çino bə Boku omən. Aeroportədə hiç qıley zumandə nəzarət ni. Nom familiya və unvani xəbə sedən, tempraturi pamudən vadodən. Çe Minqəçeviri noxəşxonəku har ruj bey zanq kardedən, xəbə sedən ki, təblarzi əvış qətə ya ne. Əvən votedə ki, bərk ekıredə, cəvobədə bey məsləhət zınedən ki, bışo bə doktori muraciət bıko. Məmmədli ımən votəşe ki, çey kinə deştə şuə temperaturşon heste, həmən ekıredən, əvonşon Kilnik Tibbiə Mərkəzədə de sirayətkardə noxəşinon bə i palata dəğandəşone. Dəvo-darzənon bə çəvon ıştəni dodən hırie, hətto yonqoə mələfən çe keyku  varde məçbur kardəşone. Tosə ısət çəvon bə koronovirusi mubtəlo bıe barədə hiç qıley analiz bardəşon ni.

Fevralə manqi 3-ədə “İnfoteka24.ru” sayti Az.R-ədə koronovirusi səbəbiku 12 nəfəri vəfat karde barədə xəbə doşe və bımi ro hətto qıley Bokujə şəhrıvandi audio sədoşən bə cəmiyyəti edaşte. Boku rəsmiyon hələ ki, bımi çəvob doəşon ni. Məqəvuji bo niyo karde ro vacibə səbəbon heste. Səhiyyə Vəzarəti 7 nəfəri barədə doə xəbə əhali amoxt karde, həmən ıştə vəzifə kolhındəti eparçınie ro nişon doə qıley cəhdebən.