İlham Əliyev beynəlxalğ təşkilatonış tənğid karde.

Azərbaycan Respublika prezident ım kişvəri parlament səçıni barədə Avropa Şura ğətnomə qıləy beğanun və pesoxtə bıə hərəkət bə hisobış varde.

Bə İrna raporti əsos İlham Əliyev tojədən votışe: jıqonə ğətnoməon çəmə daxıli koonədə mıdoxilə karde mənoədəy ki bəpesoxtə bıə məlumaton əsos ğeyd bıə.

Azərbaycan Respublika prezident əmmo ım kişvərədə tojə səçıni bo məmlekəti inkişofiro vey muhimmə vəsfış karde və votışe: ım səçıni dəvoniyəku hədəf islahat be.

Bə Ruyterz aqentiyəti raporti əsos, Yap partiya tojədən elanış karde ki, parlamentədə ijən əksəriyət kursion sohib bəy.

Çımi bənav yəni parlament səçıni 5-nə dıvrədə həm Azərbaycan Respublika hakim partiya muvəffəğ bıə be ki motləğ sorəti milli məclesi hakim bıbu.

Səçınədə 20 qılə partiya və siyasi qrup iştirok kardedə bin və sədoon 5573 qılə vırə ya xot sədo cəmədə şobədə cəmaətiku səşone.

Azərbaycan Respublika Səçın mərkəzi kamissiya elanış karde ki təğribən icozəşon bıə cəmaətiku 47 faiz milli məclesi 6-nə dıvrə səçınədə iştirok kardışon, və hol ım ki dəvardə dıvrə iştiroki miğdor 55 faiz elan bıə be.

Im nəticə bəpeştə Avropa kali təşkilaton əcumlə Avropa bəşər həxon və demokratiya, Avropa şura iyən co manitorinqədə qrupon bəyaniyədə elan kardışone ki ım səçın de demokratik standardi həmohənq nıbe.