Az.R bo mass-media ğənim peqardə məmləkəronədə qıleye.

Yanvari 28-ədə Avropa Şura Parlamentə Assambleya “Avropadə bo media azadi və jurnaliston əmniyyəti ro təhdidon” nomədə ğətnomə ğəbul kardışe. Bı sənədədə Az.R-ədə mevcudə vəziyyəti barədə əleydə bənd heste və Boku hokumətiku mətbuati azadi və əmniyyəti roədə Avropa Şura vədə peqətə ehdədarion bə vırə rosnie tələb bedə.

AŞPA deputaton Əliyevi hokumət bə KİV-on ıştə deşmenə siyasəti bıno-pe əvəz karde, de pesoxtə ittihamon muhakimə bıə jurnaliston vadoe, bə mustəğilə sayton blok noe orəx doe  dəvət kardəşone. Ğətnamədə həmən ğeyd bıə ki, 2017-minə soriku jıqoşə bə jurnaliston əleyh 18 qılə çinayətə ko bino bıə, tosə dəvardə sori mayə manqi, 5 qılə jurnalist zindonədə bıə.

Çe Avropa Şura bə media azadiəti dair məruzəkar Stefan Şennak ıştə bə Turan İnformasiya Aqentiyyəti doə musahibədə votəşe ki, Az.R jurnaliston muhakimə kardəyədə Avropa devləton arədə lider mevğeyonədəy. Əv bəpe ıştə zindonədə bıə yurnaliston azad bıkardo.

Haliyədə jurnaliston Ziya Əsədli, Əfğan Muxtarlı, Polad Aslanov və Elçin İsmayıllı zindonədən. Avropa Parlament nezə rujonədə Az.R-ədə siyasiə məhbuson məsələn muzakirə bəkarde.

“Azadlıq.info” xəbə dodə ki, Respublika Sər Prokuratura bə Jamaz.info sayti sər redaktor Fikrət Fərəməzoğlu çəşnavi doəşe ki, quya çey sayt “Kutləviə informasiya vasiton həxədə” Respubluika ğanuni darıştedə, Tovuz rayoni Donqar Quşçu diədə vağeə bıə cinayətə hadisə barədə huğuğə muhafizə orğanon bardə təhğiğati bə şubhə ji dənodə, bə cəmiyyəti ğərəzinə, bə istintaği qardışi zidd xəbəon rosnidə, demiən bə istintaği mane bedə.

Imiən ğeyd karde lozime ki, Fərəməzoğlu 2017-minə sori noyabrə manqi 21-ədə Boku qonə cinayəton məhkəmə bə 7 sornə zindonə cəzo məhkum kardəşbe, de dəvardə sori martə manqi 18-minə ruji əfv fərmani çe zindono vadoəşone. Isət Respublika Sər Prokuratura çey jurnalistə fəaliyyəti səbəbiku sənibəton ey de bə zindon dənoe təhdid kardedə.