Az.R ərazi 60% de bə səhra peqarde xəto dimbədime.

Haliyədə çe Az.R 36 qılə rayoni əraziədə bə səhra peqardə proses muşahidə bedə, sakinon niməsən veyə ğism jıqo zəminonədə jimon kardedən. Im sıxanon bə “Sputnik Azərbaycan”i muxbiri Azərbaycani Milliə Elmon Akademiya Coğrafiya İnstituti elmiə katib Mirnuh İsmayılovi votəşe.

Çey votəyonku məlum bedə ki, Respublika əraziədə ekoloji risk bə əməl vardə amilon xeyli veyin. Ovayz, zəminvajiə, hışki, texnoqenə təzyiğon həmonə amilonədən. Qruntə suə ovon bə dim beşe zəminon bə bəlyəkot peqarde səbəb bedə. Im riskon vəy nıse həmonə ərazion bə səhra peqarde xəto bə əməl vardəşe, ısət Respublika ərazi 60% de ım xəto dimbədime. Im ekoloji ğəzo vəy se ro hokuməti tərəfo kompleks tədbiron bəpe bə jimon dəvuniə bıbo. Dəvardə sori 650 həzo qılə toğə kaştə bıə. Məxsusən vişəon ancə vıronədə ənətəxir bəpe bərpo tədbiron icra, yəni tojə toğəon ejənə bıbo.

Mirnuh İsmayılovi ımən votəşe ki, ekoloji riskon əksəriyyət de insoni fəaliyyəti obaste. Atmosferi və ovə hevzəon çırkin bıe, zəminvajiəy, texniki təzyiğon ziyod bıe bilavasitə insonon fəaliyyəti nəticədə bə əməl omedə. Tolışmedia.com saytən nıvıştedə ki, haliyədə məmləkəti 400 qılə məntəğədə fəalə zəminvajiə proses bə ğeyd sə bıə. Hətto Boku əraziən ım ekoloji xətoku diəro ni. Paytaxti Bayıl əraziədə 2017-minə sori ım xəto nəticədə 80 qılə kə rıjie, sori bədiqə 22 qılə, dəvardə sori 98 qılə kə bə ğəzo vəziyyət eqınie. Boku hokumət jıqo vajiə prosesi səbəbi omute ro dee çe Yaponiyaku mutəxəssison dəvət kardışe. Əmo bə ım prosesi səbəbi dair tosə ısət hiç qıley izahat doəşonni. Isət Respublika sayton  Badamdar ğəsəbədən zəminvajiə prosesi aktiv beku xəbə dodən. Hokuməti jıqo vəziyyəti vəy se ro vində tədbiron həxədə jəqo qıley xəbə ni. Məqəvuji Yaponiya mutəxəssison ım ekoloji ğəzo səbəb çəvon bardə xaotik inşaatə koon nəticədə bə əməl ome bəvon votəşone.