Çe Yunis Səfərovi məhkəmə bə təxir eğandışone.

Yunis Səfərov ki, Qəncə icra sərdarış de qolulə jəbe, çey məhkəmə, fevrali 17-ədə dəvom kardışe. Bə ım muhakimə prosesi Qəncə Qonə Cinayəton Məhkəmə sədr Natiğ Əliyev rəhbərəti kardedə.

Vəkil Nazim Musayevi vəsadət ros kardəşe ki,  Əliyevi bı koy diə karde ixtiyar nişe, çunki çe zərərdidə Elmar Vəliyevi xışəvande. Əv bəpe ıştən çe ım koyku imtina bıkardo. Musayevi qıley jıqo vəsadətən bə nav doəşe ki, bə ım koy Qəncə Qonə Cinayəton Məhkəmə bəpe diə nıko bə ə səbəb ki, Natiğ Əliyev əyo sədre, çə vırəy hakimon həmə bey tabeyin.  Bə vəkili ım votəyon hiç kəsi etiraz kardəş ni. Prokuroriən votəşe ki, ım vəsadəton bə Qəncə Apellyasiya Məhkəmə vığandə bıbo, bıdə əyo de ım koy əlağədar ğəror bıdon. Hakim Natiğ Əliyevən de ım təklifi rozi bıə. Proses tosə Apellyasiya Məhkəmə ğərori bə təxir eğandəşone.

“Xeberman.com” sayti sər redaktor jurnalist Polad Aslanovi məhkəmən həmonə ruji dəvardə. Aslanovi ıştə nitğədə votəşe ki, Devlətə Əmniyyətə Xidməti həmkaron bey şər ğandedən, ğisas sedən, çunki əv ıştə saytədə çəvon bə Məşhəd və Kərbəlo şə zəvvaronku rışvə tələb kardə hərəkəton barədə məğalon nıvıştəşbe. Çey de İroni Xidmətə orğanonən hiç qıley həmkarəti və ya əlağəş bıə ni, bə hiç qıley devlətə sırriən vaqif bıə ni ki, əvoni bə qıley tərəfi dəvunie bızıno. Ey həmən ğeyd kardəşe ki, istintağədə əvşon də çey jimoni həmro və kinə təhdidi roy məcbur kardışone ki, bə ıştə əleyh ifadə ğol bıkəşo.

Əlavən vote lozime ki, jurnalist Polad Aslanov 2019-minə sori iyunə manqi 12-ədə çe Devlətə Əmniyyətə Xidməti həmkaron tərəfo dastqir bıə, de Cinayətə Məcəllə bə devləti xəyanət və bə co kəsi de kışte rıjd ome maddəon ittiham bedə.