İronədə Parlamentə entexabaton.

De miladi təğvimi fevralə manqi 21 İron İslamə Respublikadə bə Parlament, həmən bə Əhlixıbirə Eksperton Məclisi entexabatə ruje.

Devləti Ğanundoə orğani 290 qılə deputatə vırə bə dast varde ro 7 həzosən vey namizəd de yəndı bəhs bardedən. İİR Prezident Həsən Ruhani İroni xəlğ dəvət kardəşe ki, ım entexabatonədə fəal iştirak bıkon, çunki cəmiyyəti vədə mandə har qıley problemi de əhali fəal iştiqaki roy çe arə barde bəbe. Im koədə hokumət və parlamentən bəpe de yəndı həmkarəti bıkardon.

Prezident Ruhani ımən ğeyd kardəşe ki, deşmenon keynə çəmə problemonku istifadə karde piədə, İroni xəlıği həmişə deştə vəhdəti çəvon ım nısığ bə puç bekardəşe. Im entexabatədə bəpe hiç kəs bə kəno nımando, nıvoto ki, bo mı fərğ nişe, kii bə parlament vıjniə bəbe, çunki çımı duston bə namizədəti təsdığ nıbin. Im vıjniəy bo çəmə ayəndə yolə əhəmiyyətış heste.

İroni Mudafiə vəzir, briqada qeneral Əmir Hatəmi çoşanbə ruji Mudafiə Vəzarəti həmkaron vədə ıştə ehandə nitğədə ğeyd kardışe ki, bo məmləkəti strateji və siyasi vəziyyəti sərost analiz karde zınə zumandə parlament vıjnie lozime.

İroni Entexabaton Ğərərqahi sədr Camal Urf vıjniəyon ərəfədə dəvardə mətbuatə konfransədə ğeyd kardəşe ki, bımi ro 208 qılə vıjniə dairə və 54 həzosən vey vıjniə məntəğə təşkil kardəşone. Həmən bo dini kamiyon əlavə 5 qılə dairən onoə bıə.  İronədə 57 milyon 918 həzo odəmi sədo doə huğuğ hestışe. Cəş kardə bedə ki, çəvon 60%-sən veyə ğism bı entexabatədə iştirak bəkarde.  

Entexabati ərəfə rujon xəbəonku məlum bedə ki, İnğilabi Ğıvvon Koalisiya və İslami İnğilabi Sabitə Cəbhə de Məhəmməd Bağir Qalibaf`i sədarəti muştərəkə vıjniə siyahi barədə bə roziyəti omən. Eyən bıvotəmon ki, Qalibaf nafko çe Tehroni mer vəzifədə ko kardəşe.