Şeyx Sərdar Hacıhəsənli çe zindono bə azadi beşe.
Ozərbaycani Ruhanion Məclisi uzv, “Maide.az” sayti sərredaktor, ruhani Şeyx Sərdar Hacıhəsənli Masəlu rayoni çəmiyyəti arədə barzə nufuzi soyb bıe. Hokumət çimiku bərk bə xof dəqıniəbe. Bə səbəbən rayoni icra sərdari çeyku bə polisi şikat kardışe, 2017-minə sori fevrali 22-ədə Şeyxşon dastqir və bə 3 sornə zindonə cəzo məhkum karde. Isət çey məhbəsi muddət bə orəx rəsə, əvşon şəvi nimədə çe zindono azad kardə.
“Maide.az” ım xəbə bə cəmiyyəti rosniəşe. Maştəvo xeyli odəm bə çey ziyarət omən. Çey duston dey ım didori Yasamal rayoni “Mərasimə kə” nominə ictimaiə bina zalədə dəvunie piəşone, əmo polison çimiku xəbə qətəşone, omən bə ım tədbiri mane bıən, odəmon həmon zali tərk karde tələb kardəşone. Bə islami əleyh siyasət bardə Boku hokumət yəğin dərəsedə ki, Şeyx Sərdari bə zindon dəğande, nəinki bə çey nufizi xələl nıvardışe, çey tərəfdaron torsonie nızınışe, əksinə çey nufuz həniən barz, tərəfdaronış tikiən ziyod bin.
Çe dini fəalon huğuğon daima darışte bo Əliyevi hokuməti bə qıley vərdış peqardə. Çand ruj çimi bə nav Mısılmonon İbemonə Hərəkəti sədr çe Hacı Taieh Bağırzadə bə Hərəkati uzvon polison təzyiğ karde barədə məktub “Fasebook”ədə pevolo bıe. Bı məktubədə Hacı Taleh nıvıştedə ki, ıştə ictimai–siyasi mevğe səbəbiku Hərəkati uzvon besəbəb bə zorə strukturon təhdid və təzyiği məruz mandedən.
Bə Qəncə mənbusonən zindonxonədə işqəncəon doe həxədə Respublika Mass-mediadə rə-rə xəbəon dərc bedən. Dəvardə rujonədə Azadi Radio məhbus Elnur Qəmbərovi, “Azadlıq.info” Samir İbrahimovi bə işqəncəon məruz mande barədə bə cəmiyyəti xəbə rosnişone. Ədliyyə Vəzarəti Penitensiarə Xidməti de ictimaiyyəti əlağə şebə rəis Mehman Sadıqovi ım votəyon bə həşə jeşe, votışe ki, məmləkəti zindononədə daxili nizam-intizami darıştə məhbuson tehmət sedən, yainki bə karser dənoə bedən. İşqəncə doe və ia kue fakton barədə sehbət bıe əzıni.
