Ləcədi sakinon sosialə mışğılon həll bedəni.

Isətnə Şabran, navkonə Dəvəçi rayoni Ləcədi nomədə qıley di hesışte. Çand sorone ki, ım diy sakinon quzəroni mışğılon nəinki həll bedəni, hətto sorbəsor həniən qıvonin bedə. Bə rayoni rəhbəriyyəti çand bəjəm kardə şikayəton besəmər mande səbəbiku əvon ıştə dim bə Meydan TV tərəf qordıniəşone.

Diy əji Nəzakət Əmrullayeva bo muxbiri ıştə divojon dard qəp jəşe, votəşe ki, çəvon ən muhumə problem ğaz, peşomə ov, məktəbi nıbe, roon bərbod holədə bıeye. Dəvardə manqi əvon xəbə qətışone ki, rayoni icra sərdar bə hamsuə di omə, əvonən vite-vite şin əyo ki, ıştə dardon barədə bey lovə bıkardon. Əmo sərdari bəvon quş doəş ni, votəşe ki, həftəyi bədiqə bə çəvon di təşrif bəvarde, bəvədə çəvon problemon bəməse. Təəssufinə hole ki, ey bəştə ım sıxani əməl kardəşni.

Ləcədi rayoni mərkəziku 15 km diəroy. Bandə diy. Bə ətrofi çand qılə dionən  tosə ısət ğaz onıkırnie səbəbiku ım dion əhali de ezımi ıştə quzəroni dəvunidə. Həni ətrofi vişəonən orəxən, çimi nəticən əv bıə ki, diy nezə honion həmə bə hışk qıniən. Bo ovi ro çand kilometr ro piyodə şənin bedən. Diədə məktəb ni. Hırdənon bə hamsuə Ğələqoh di məktəb şe ro xeyli məsafə ğət karde məcburiyyədədə mandedən. Həmonə diy məktəbən tosə 9-minə sinifie. 10-11 minə sinifon orıxnie ro əğılon həniən bə diəroə dion şe-omə kardedən. 8 kilometrinə Ləcədi-Qendov, 4 kilometrinə Ləcədi-Ğələqah roon çand sorone ki, təmir nıbe səbəbiku tamam vılo bən, bə bərbod vəziyyət eqıniən.

Şabran rayoni İcra Hakimiyyətiku bə muxbiri votəşone ki, əvon həmonə dion əhali problemon həll karde ro dastonkuşon omə koon kardedən. Dəvardə manqi icra sərdar Kiləvar və Rəhimli dionədə de əjion vindemon kardəşe , çəvon şikayəton məsəşe, divojon sosialə mışğılon həll karde roədə əməli tədbiron vinde ro bə rayoni muvafiğ idarə rəhbəron  dəsturon doəşe.