Az.R-ədə de koronavirusi əlağədar vəziyyət çı curəy.

Koronavirusi mərəzi bə dınyo məmləkəron siyarət karde vəy se , təəssuf bıbo , hələ ki, mumkun bedəni. Bə fevrali 24-minə ruji məlumati əsasən dınyo 36 qılə məmləkətədə ım virusi sirayət kardə odəmon muəyyən bıən, əvonşon bə karantin peqətə.

Həmonə keşvəron restədə ğeyrəz Cini  İtaliya, Yaponiya, AİŞ, Avstraliya, Rusiya, İron, Almaniya, Britaniya, Fransa, Kanada və diqər devlətonən hestin. Təğribən 80 həzo nəfər bə ım zıkomə noxəşi, yəni bə qripi ım nevi mubtəlo bıe, çəvonədə 25 həzosən vey mualicə nəticədə şifo peydo kardəşe, 2 həzo 600 nəfəri isə ıştə jimon çe dasto doəşe.

İronədən bə ım virusi mubtəlo bıə, və çeyku tələf bıə odəmon hestin, devləti ım rəsmən təsdığ kardışe. Hiçən təsaduf ni ki, İroni bədxahon ım fakt de həvəsi ğəbul kardışone. Ali Rəhbər Ayətullah Xamenei bı barədə votışe ki, deşmenon bə İroni əleyh antitəbliğatə kompaniyadə ım virusə vonəkuən istifadə kardedən.

“Sputnik Azərbaycan” bə Report-i istinadən fevrali 23-ku Boku hokuməti de İroni Ostoro və Biləsuvar marzi ovaştə məntəğəon itərəfinə ğaydədə dəbaste xəbə bə çəmiyyəti nəzə rosnişe. Hərçənd ki, ğeyri-rəsmiə məlumatonədə Boku Mərkəziə Klinika və Sipiə Ciqərə noxəşinon mərizxonədə çe koronavirusiku marde xəbəon hestin. Hələ fevrali sıftənə həftədə Meydan TV xəbə doşəşbe ki, Az.R-ədə çe Cino omə odəmon bə karantin oqətedənin. Imən məlume ki, koronavirusi inkubasiya muddət tosə 2 həftəy, çe Cino omə har kəs bəpe ım ğədər de cəmiyyəti təmasiku diəro kardə bıbo. Əmo Boku hokuməti bə ım ğaydə əməl nıkardışe. Hicən təəccubin ni ki, ısət sosialə şəbəkəonədə Respublikadə bə ım virusi mubtəlo barədə şaion nəvedən, “İnfoteka 24” saytiən bı barədə qıley audio fayl pevolo kardışe. Əmo Əliyevi  hokuməti bəştə kanə xosyəti muvafiğ bımi reaksiya doşe, rəsmən elan kardışe ki, haliyədə Respublikadə de koronavirus mərəzi bə mərizxonəon dəğandə noxəşin ni.