Pensə diy problemon.

Pensə Ostoro şəhrestoni yolə dionədəy, 5 həzo əhali hestışe. Diy məhəllə roon çand sorone ki, təmir bedəni, ısət tamam bə bərbod vəziyyət eqıniə, tojə məhəlionədə voj voəçəğin roon bə lıxmə peqardedən, çe hırdənon bə məktəb şe mumkun bedəni. Divojonən anədə kosibin ki, bə kuçəon xırış oğande ro pul qırd karde imkanədə nin.

Diy 1 numrəninə məktəb Soveti vaxtiku bəpeş, təmir nıbeku bə ğəzo vəziyyət dəqıniə. Sinifon nıtosbonie şaqirdon noxəş kardedə. Bə tojə məhəllon tosə ısət hələən ğaz okırniə bıəni. Diy elektrikə transformator anədə kanəy ki, bərğ rə-rə ğət bedə.

Ostoro İcra Hakimiyyətiku bə MeydanTV muxbiri parsi cəvobədə votəşone ki, icra sərdar dəvardə sori oktyabrə manqədə Pensə diədə de divojon didor dəvuniəşe, çəvon problemonku halie, bə əlağədar təşkilaton ım problemon həll karde ro lazımi dəsturon doəşe.

Eynən joqo problem həmən çe Boku Binəqədi rayoni Biləcəri ğəsəbədə mevcude. Çə vırəy daxili roon çand soron dırozi təmir nıbe, bey səbəb bedə ki, pozədə voj-vəşə bino bıəcəğın kuçəonədə hərəkət bə mışğıl peqardedə. Əvəsori hışkə həvosat bino bıə bəpeş avtomobilon hərəkəti ros kardə qardəvulə dasto nəfəs kəşe bedəni. Bə ğəsəbə həndəvəriku dəvardə əsasə roy asfalt okırniədə  ğəsəbə daxili roon asfalt karde ro sakinonku bo har kvadrat metri 7 mənot pul tələb kardışone. Niyazi Şirinovi bə muxbiri votəşe ki, çey jiə kuçə dırozi 200, hevuji 9 metre. Də hisobi kuçə sakinon bəpe bəvon 12 həzo mənot pul bədəyn ki, əvon ıştə vəzifə ğarzi icra bəkardin, bə çəvon kucən asfalt dəvoştin. Şirinovi həmən ğeyd kardəşe ki, əvon kosibə odəmonimon, ıştə nunə puli bəzu ğəzənc kardedən. Çəvon kuçədə jəqo qıley ərbobə odəmən ni ki, həmonə məbləği bəde, əjion ım əziyyətiku xilas bəkardi. Binəqədi rayoni İcra Hakimiyyəti numayəndə izahat doəşe ki, bə həmonə kuçəon çe Avtomobilə Roon Devlətə Aqentiyyəti tərəfo tərtib bıə proqrami tərkibədə hissə-hissə asfalt dəbəvoşten.