Polad Aslanovi bey doə ittihamon rədd kardışe.

Fevrali 24-minə ruji Boku Qonə Cinayəton Məhkəmədə “Xeberman” sayti sərredaktor jurnalist Polad Aslanovi muhakimə dəvom kardışe.

Prosesi sıftədə vəkilon bə muttəhimi parson doşone, Aslanoviən hadisə təfərruat qəp jəşe ki, “Karvan Tur” nominə şirkət bə Kərbəlo və Məşhəd ziyarəton təşkil kardedə. Im şirkəti bə devləti ali vəzifədaron şikat kardəşbe ki, çeyku bə har zəvvari miğdari qorə rışvə tələb kardedən, bə Məşhəd şə zəvvari har i kəsku 10 dollar, bə Kərbəlo şəkəsiku 20 dollar rışvə pidəşonbe.  “Xeberman” saytiən ım fakt bə cəmiyyəti nəzə rosnişe. Çimi bə peş bey təzyiğon bino be, çey dastqir bıe, bey jıqo pesoxtə ittihamon bə nav doe əsasə səbəbən məhz ım fakte. Aslanovi ımən ğeyd kardışe ki, Devləti Əmniyyətə Xidmətədə bey həmkarəti təklif kardışone, əmo əv rozi ınbe. Isətən ıştəni qınokar zınedəni, bə çey əleyh bə nav doə ittihamon rədd kardedə. İbtidai istintaği vaxti ey de çey ailə və de çey kinə təhdid kardedəbin, votedəbin ki, əgər bə protokolon ğol nıkəşo bə çəvon sə mısibəton bəvarden. Bə səbəbən bə istintaği sənədon ğol kəşe məcbur bıə.

Hakimiən elan kardəşe ki, Polad Aslanovi istintaği vaxti doə ifadəon de çey ısətnə votəyon zidd bıe səbəbiku məhkəmə tosə fevrali 27-i bə təxir eğandedə. Həmonə ruji iclasədə çe Aslanovi istintağədə votə ifadəon elan bəkarde.

Polad Aslanov ponə sori iyuni 12-də dəstqir kardəşone, ey de bə devləti xəyanətə maddə ittiham kardedən. Həmon maddə bo qınokari tosə 20 sori zindonə cəzo nəzərədə qətedə.