Cəlilabadi mərizxonədə karantinədə bıəkəson qonə vəziyyət.

Boku hokuməti axır ki, respublikadə bə korona virusi mubtəlo bıə noxəşinon mevcud bıe fakt etiraf kardışe. Fervrali 27-ədə Vəziron Kabineti tono de ım mərəzi mubarizə bardə ğərarqoh onoşone. Ostoro və Cəlilobodi mərkəziə mərizxonəonədə İrono omə şəhrıvandon bə karantin dəğande barədə bə muvafiğə təşkilaton dəsturon doşone.

Im ğərori icra iminə rujiku Respublika muxalifə Mass-media de karantin dəğandəkəson şikayəton pur bin. Bə Meydan TV, Azadi Radio, Azadlıq.info sayton doə məlumaton əsasən, ım mərizxononədə bo noxəşinon normal jimon karde ro ən elemantarə şərait nibən. Karantinədə bıəkəson bə muxbiron votəşone ki, palataonədə tatov ni, bı səbəbən duş ko kardedəni, har tərəfədə antisanitariyay, bə noxəşinon doə xorəkon harde mumkun ni,  yonqoon, mələfəon bərbod vəziyyətədən, jıqo şəraitədə hətto salemə odəm noxəş qınie bəzıne. Cəlilabadi mərizxonədə bə karantin dəğandəkəson və çəvon nezə odəmon kutləvi etiraz kardəşone ki, əvrey tərk bıkon, çimi muğabilədə bə mərizxonə ətrof polisə ğıvvon cəm kardəşone, bəvon mərizxonə tərk karde imkan doəşon ni. Im hadisə təsvir kardə video çərx Meydan TV bə cəmiyyəti rosniəşe.  “Milli Şura” sədr Cəmil Həsənliən nıvıştışe ki, rışvəxorəti və korrupsiya məmləkəti səhiyyə sistem vey vaxte ki, bə iflic vəziyyət eğandəşe. Koronovirusi çey jıqo şərait  ictimaiyyəti vədə sənibəton ifşa kardışe.

“Turan” aqentiyyətən xəbə dodə ki, Daxili Koon Vəzarəti mətbuatə xidməti səvon Ehsan Zahidovi bə mərizxonə ətrof polisə ğıvvon varde xəbə təkzib kardəşe, votəşe ki, “jəqo qıley hol bıə ni”.

Tibbi Ərazi Onoemonon İdarəkardə İbemoni rəsmi Rəvanə Əliyeva isə bəyon kardəşe ki, Ostoro və Cəlilabadi həmonə mərizxonəonədə bə pasienton xidmət barzə səviyyədə təşkil bıə, şikayət kardəkəson çe karantiniku vite pidəşone, bə səbəbən jəqo dıvuə vonəku istifadə kardedən.

Bə Səhiyyə Vəzarəti fevrali 27-minə ruji doə məlumati əsasən Ostoro mərizxonədə 86, Cəlilabadi Mərizxonədə isə 91 nəfər bə karantin dəğandə bıə.