Mənoti devalvasiya çəş kardə bedə.

Çe Az.R iğtisadiyyatədə tənəzzul ım sori 2 manqədən dəvom kardedə. İğtisadşunas Nemət Əliyev “Azadlıq.info” saytədə nıvıştedə ki, yanvarə manqədə bə devlətə budcə mədaxilon 13,7% kam bıə, yəni dəvardə sori yanvarədə bə budcə 2 milyard 100 milyon mənot vəsait daxil bıəbebu, ımsornə yanvarə manqi mədaxil 1 milyard 800 milyon mənot bıə. N. Əliyevi bo vəomə manqon doə proqnozonən ım tendensiya dəvom kardeku xəbə dodə.

Məlume ki, ımsornə budcə 24 milyard mənot muəyyən kardəşone, ımən har manq bə budcə 2 milyard mənot vəsaiti daxil bıe ehtiva kardedə. Əmo keşvərədə xomə nati hasilati kam bıe, həmən dınyo birjaonədə de koronovirusi əlağədar çey məzənnə sari eqınie, anədə vəsaiti bə budcə qırd kardə koədə mışğılon bə əməl ome labud kardedə.

Diqər iğtisadi təhlilqərə alim Qubad İbadoğlu fikrən jıqoe ki, ımsor bə mənoti təzyiğon həniən qıvonin bəbe. Bımi ro əv çand qılə səbəb nişon dodə, izah kardedə ki, dəvardə sori xarici ticatəti balans 3 milyard dollar bə kam bıə. Im tendansiya ım sorən dəvom kardedə. Imən bə idxali məsərf bıə valyuta miğdari həniən ziyod bəkarde. Devlətə Natə Fondi ımsornə mədaxil ponə sorisə 30% kam nəzərədə qətə bıə, ımən de Kaspi dıyo natə mədənonədə hasilati 186 milyon barel, yəni dəvardə sorisə 10 milyon barel kam bıe əlağədare. Mərkəzi Banki dəvardə həftonədə ğəbil kardə libaralə valyuta siyasəti barədə ğəror çe məmləkəto valyuta bekarde prosesi həniən hoson, demiən devləti valyuta ehtiyaton tikiən  kam bəkarde. Bə keşvəri iğtisadiyyati xarico omə investisiyan sorbəsor kam bedə, 2017-minə sori 5,7 milyard dollariku bə dəvardə sori 2,76 milyard dollar, yəni 2 kərəsən vey saru eqıniə.

İbadoğlu fikrən jıqoe ki, qirəm dınyo vıjoronədə nati ğıyməti saru eqınie, həmən koronovirusi səbəbiku de Rusiya, İron və Turkiyə ticari munasibətonədə mışğılon dəvom bıkardo, bəvədə mənoti çe devalvasiyaku  xilas karde mumkun nibəbe.