Çe TAP uzvi xeyzon bekorəti səbəbiku bə səfalət dıço bıə

Hakim Şabanov çe Ostoro şəhrestoni Siyoku diy əjie. Xeyzonxıvande, 2 qılə fərzənd hestışe. Ko peydo nlbe səbəbiku xeyzonumjən bə Boku kuç karde məcbur bıə.

Manqi bə 200 mənot kə bə kirayə qətəşe. Əmo Bokuədən daimi ko peydo karde zınedəni. Ey ıştə dard bo Meydan TV qəp jəşe. Votəşe ki, çe TAP uzve, hərbi xidmətədə bıə. Əyo sə xəsarəti nəticədə i çəşış mayf bıə, vindedəni. Devlətiku hiç qıley dastək sedəni. Çand sore ki, bə devləti orqanon bo koy muraciət kardedə, hiç vırədə jəqo qıley ko ni ki, ıştə ailə əmrəməli təmin karde bızınıo. Bı nezonədə "DOST" nominə mərkəziku bey de 265 mənot məvacibi fəhləti təklif kardəşone. Əv rozi bıə ni, votedə ki, manqi 200 mənot bə kə kirayə , ə mandəyən bə ro şe-omə sərf bəbe, bəs ıştə ailə çoko vi-vay bədo?

Ostoro İcra Hakimiyyətiku bə muxbiri votəşone ki, Şabanovi bə Prezidenti nıvıştə muraciət bəvon vığandəşone. Əvon bə Şabanovi bə rayon oqarde təklif kardəşone, əmo ey çimiku imtina kardəşe.

DOST votəynə mərkəz 2019-minə sori mayə manqiku fəaliyyətədəy. De Prezidenti fərmani də məğsədi onoə bıə ki, əhali məşğuləti, sosial mudafiə təmin bıkardo. "Tolışmedia.com" sayti Yardımlı və Lankoni rayononədə ım proqrami çərçivədə mevşud bıə dələdızdiətion barədə nıvıştışe. Xəbə doşe ki, DOST mərkəzi siyahiədə ki, bənə bekorə odəmon maddi komək nişon doə bedə, əksərən muxtəlif vəzifəonədə ko kardəkəsonin. Məhz jıqo dələdızdə əməlon nəticəy ki, bənə Hakim Şabanovi beçizə fəğır-fuğəraon ıştə vətəno bə ğəribə məhol bo i ğıç nuni dərbədər eqınidən. Rayonon xəzpuşə məmuron devləti bo beçizon co kardə pulon dələmurd kardedən. Devləti huğuğ muhafizə orğanonən bə joqo cinayətə fakton məhəl nodənin . Bə səbəb ki, əvon həmə i qılə toyfə odəmonin. Bo i yəndı zəhmətkəşə xəlği həxi dəbırie , əvoni talan və istismar karde ro şərait soxtedən.