İroni ictimaiyyəti Hacı İlham Əliyevi bə zindon dənoe etiraz kardışe.

Boku hokuməti bə islami navğədəm və fəalon sənibəton həmlə karde İİR çəmiyyətədə bə qıley rezonansi səbəb bıə. “Nur-az.com” Çe Təbrizi Azərşəhr və Usku məntəğəon İslami Şura Məclisi tojə numayəndə doktor Ruhullah Mutəfəkkirazad`i bə Hacı İlhami dastqir bıe nəzərən ıştə “Tvitter” səhifədə nıvıştıştəy bə əhandon təğdim kardəşe.

Doktor Mutəfəkkirzadi votəşe: “ Çe Boku hokuməti jıqo əməl bəmə nişon dodə ki,  İİR deştə hamsuəon munasibətonədə bəpe əvəzon bıkardo. Diə məkəmon ki, əmə dəvon munasibəton bəpe mənfi balansi səpe onınəmon, əmo çəvon bə islamçion kardə təzyiğon bəpe boəvon boho təmom bıbo”.

Mısılmonə Jurnaliston İbemoni Ərdəbil şebə, “Məşər İmonə Cəmiyyət”, Azəri Əyaləton Tələbə Hərəkati  uzvon, Kurdustani Təriğətə Əhli Alimon İbemoni sədr, Dehqulan şəhəri imam cumə Əbdussalam Məhəmmədi, həmən Doktor Əli Əkbər Raifpur, Doktor Məsumə Nəsiri, sandinə məddah Məhdi Rəsuli və İroni həniən co mədəni və İctimai fəalon Az.R-ədə bə islamiə navğədəmon munasibətədə vağeə bıə təhdidə siyasəti ıştə etiraz bəyon kardəşone ki, Boku hokuməti bə şiəon ıştə dini mərasimon dəvunie ğədəğən kardəşe, Nardaran, Boku, Qəncədə bə şion əleyh çand sorone ki, repressiyon dəvunidə. Əmo Qeneral Ğasım Soleymani şəhadəti ım məmləkəti əhali ğəlbədə qıley zumandə inğilabiə hərəkat bə əməl varde. Əliyevi rejim çimiku bə təşviş dəşe, sənibəton bəştə repressiya əməlon rəvoc doşe, İslamə Partiya sədri əvəz, sandinə ruhani, hoccətul-islam  Hacı İlham Əliyev de şər və bıhtonə maddə bə zindon dənoşe. Hacı İlham çe məmləkəti mənəviyyatinə şəxsiyyətono qıleye, çimi çand sor bə navən bə hicabi ğədəğə etiraz karde səbəbiku 2 sor zindonə cəzo kəşəşe. Bə jıqo antiislamə siyasəti etiraz kardə xadim və ictimai fəalon Əliyevi hokumətiku piəşone ki, bə bəşəri huğuğuon hurmət bıkardo, Hoccətul-islam Hacı İlhami və giqər islamiciə məhbuson çe məhbəso va bıdo, de sionistə ğıvvon və cinayətkarə Amerika rejimi dəsturi ıştə de məmləkəti dindarə cəmiyyəti mubarizə bardə siyasətiku omando.