Az.R-ədə de koronavirusi əlağədar əlahidə tədbiron.
Umumdınyo Səhiyyə Təşkilati koronavirisi bə dınyo devləton əksəriyyəti pevolo bıe səbəbiku ım mərəzış qlobalə pandemiya elan karde. Az.R Vəziron Kabineti tono Operativə Ğərərqohi martə manqi 14-ku 1 manqi muddətədə keşvəri əraziədə sosialə izolyasiya tədbiron elan kardəşe.
Həmonə rujiku kutləvi mədəni və vərzeşə tədbiron bə təxir eğandedən, muzey, teatr, əyləncə mərkəzon, vərzeşə zalon dəvastedən, ğeyrəz dəfn mərasimon, çodo və mərasimə zalonədə huzrə məclison , restoran, kafe, şodmonə sarayonədə vəyə və co kutləviə qırdbemonon dəvunie, bə turizmə muəssison daxil bıe, devləti koonədə koəkon və səhiyyə həmkaron beicazə bə xariciə səfəron şe ğədəğən bedə.
Boku hokuməti bə əhali ım çəşnavion doe bəpeş, Respublika Mass-medionədə de ımon əlağədar xeyli xəbəon dərc kardışone. Məlum bıe ki, keşvəri futbolə musabiğati hənəkon, çe Bokuku bə Almaniya, Fransa, Ğəzəxıston pərə çand qılə həvopeyma reyson oqətəşone. Az.R hokuməti de ıştə Turkiyə həmkaron bə ğəror omə ki, çəvon məmləkəton arədə həvo və zəminə əlağon muvəğğəti ğət bıkardon. Bə ASAN xidmət mərkəzon fəaliyyəti məhdudiyyət noəşone, çe vərzeşə qimnastika Dınyo Kubokə musabiğat ki, Bokuədə dəvardedəbe, nimədə oğətəşone, çey finalə mərhələ ləğv kardəşone, ticari mərkəzonədə ərzaği bə kə rosniə xidməti bə ko dəbəğanden.
İğtisadiyyati vəzir Mikayıl Cabbarovi bəyon kardəşe ki, məmləkətədə de ərzaği defisiti əlağədar hiç qıley xəto ni, devləti amboonədə kafi ğədər rezerv ərzağ ehtiyaton hestin. Bə tibbi maskaon ehtiyaci təmin karde ro lozımiə ovdonon bə məmləkət vardəşone, nezə vaxtonədə ım məhsuli istehsali təşkil bəkarden.
Operativə Ğərərqohi həmən bə şəhrıvandon çəşnavi doəşe ki, bə elan bıə məhdudiyyəton ciddi əməl bıkardon, bə Kutləviə İnformasiya Vasitəon isə məsləhət zınəşe ki, ğeyri-səhihə informasiya pevolo nıkon, , hokuməti bardə tədbiron səpe soğnə eğandə, əhali bə təşviş vardə nıvıştəyon və reportajon rəvoc nıdon.
Bə “Sputnik Azərbaycan”-i doə məlumati istinadən bə Milli Məclis de ım vəziyyəti əlağədar muvafiğ sənəd daxil bıə, deputaton ey nezə rujonədə muzakirə bəkarden.
