Az.R –də dini fəalon bə Mutəhərri xatirə həsr bıə Darujinə dəbəvunien.

Bə islami dınyo yolə filosof Murtəza Mutəhərri fikron oşno bıe ısətnə zəmonədə yolə ehtiyac heste. Çunki dınyoədə zulm, hiylə, nifağə cərəyani casuson ım yolə alimi həxədə daima pesoxtə məlumaton pevolo karde ro cəhd nişon dodən.

Bə ım səbəb Azərbaycani cıvonon ım alimi sofə əğidə bə cəmiyyəti rosnie ro apreli 21-minə rujiku tosə mayə manqi 1-minə ruji “Bo Şəhid  Mutəhərri Darujinə” elan kardəşone. Im xəbə “Qafqaz.ir” sayti bə əhandon edaştəşe. Çe Az.R dini elmi tələbəon və mədəni fəalonədə i qrupi ım təşəbbus bə nav doəşone. Əvon ğeyd kardəşone ki, “De şəhid ustad Murtəza Mutəhərri irsi oşno bıe haliyədə de şiddəti ehtiyac hiss kardə bedə. Çey dini-fəlsəfi məktəbi dınyo miğyasədə mısılmon və ğeyri-mısılmonon dılədə de çand milyoni tərəfdaron hestışe. Az.R-ədən ım alimi fikron təbliğ karde ro Darujinə çərçivədə muxtəlif tədbiron dəbəvunen, sosialə şəbəkəonədə çe Mutəhərri əsəron pevolo bəkarden, virtualə numayişqahon obənon. “Qafqaz.ir” sayt həmən xəbə dodə ki, Az.R devləti telekanalon bə dindaron və ğeyri-dindaron munasibətədə ğərəz nişon dodən. Sosialə şəbəkəon Azərbaycani seqmentədə yuzeron ğeyd kardedən ki, de koronavirusə karantini əlağədar bə beçizə ailəon komək baxş kardə dini fəalon hokumət dastqir kardedə, bə zindon şododə. Əmo  devləti telekanalon bənə Bayram Nurlu qıley homoseksuali bə jəqo ailəon kardə ərzağə koməkəti kəşedə, televiziya ekranonədə bo Respublika ictimaiyyəti reklam kardedə, bey təşəkkur votedə.

Əlavən ğeyd karde bə vırə eqınedə ki, orəxnə həftəonədə çe Mısılmonə İbemonə Hərəkəti çand qılə uzv bə beçizə ailəon koməkəti karde səbəbiku polison tərəfo bə inzibatiə zindonə cəzo məhkum kardəşone.