Boku hokumət Sietli hadisəku boçi tarsedə.
Mayə manqi 26-minə rujiku AİŞ-ədə bino bıə etirazə aksiyaon hələən dəvom kardedə. Çe məmləkəti şimal –ğərbədə Vaşinqton ştati Sietl şəhərədə ki, ım etirazon şəhəri 8 qılə rayonədə hakimiyyəti bə çəvon dast ovaşte vardəşe bekardəşe. Əvon ım ərazi Muxtar zona elan kardəşone. Çəvrey polis və Milliə Qvardiya ğərarqahon qətəşone.
Prezident Tranp ıştə Tvvitter səhifədə ım hərəkəti iştirakəkəon “daxiliə terroriston” hisob kardəşe, şəhəri meri və ştati qubernatori vədə tələb noşe ki, ənətəxir ım anarxiya vəy bısənon, şəhərədə hakimiyyəti bərpo bıkon. Sietli meri bə Trampi cəvobədə bey məsləhət zınəşe ki, “ oqardo, bışo bınışto ıştə bunkerədə”. Analitikon jıqo proqnoz dodən ki, Sietli Muxtariyyət hətto tosə prezidentə entexabati dəvom karde bəzıne, ki, bo Trampi məğlub karde ro demokraton dastədə çokə vonə bıbo. Çunki usyankaron fəaliyyət nişon doə məntəğə qubernator və şəhəri mer çe Trampi siyasiə rəğib – Demokratik Partiya tərəfdaronin. Çe Amerika nufuzinə The Wall Street Journal “Sietli Muxtarə məntəğə” bənə çe Amerika ğanunon və hakimiyyəti fəaliyyət nikardə ərazi ğıymət doəşe. Rusiya 1 Telekanali ım Muxtariyyət “Sietl Xalğə Respublika” hisob kardəşe.
İyo qıley marağinə cəhət heste. Əvən çımiku ibarəte ki, Az.R nə hokuməti, nəən muxalifəti Mass-media Sietli hadisəon barədə bə cəmiyyəti məlumat edaştedənin. Arədə qəpon nəvedən ki, Əliyev hokuməti bı barədə bəvon dəstur vığandəşe, ım koy təbliğ nıkon ki, tolışonku jəqo qıley stimul bə əməl nıvardon. Çunki dəvardə əsri 90-minə soron əvvələdə Tolışə xalğ 2 kərə ıştə jimon kardə mərkəzi şəhərədə hokumət peqordıniəşonbe. 1990-minə sori yanvarədə hələ Şura hokuməti vaxti de Əliəkrəm Hummətovi sərdarəti Sovet hokumət sərnequn kardışone. Çəyo -93-minə sori iyunədə həmonə hadisə bə AXC-Musavat hakimiyyəti sə vardışone. Əvonşon peqordınie, Tolışə Mığonə Respublika elan kardışone. Isətən Az.R-ədə çe əhali hokuməti irtica siyasətiku noroziəti rujbəruj ziyod bıə vaxtədə Sietli Muxtariyyəti barədə qəp je, demiən tolışon tarixi yaddaşti tojə karde xəto, məqəvuji Boku hokumətən çok dərəsedə. Bı səbəbən əvon bı barədə tam je əfsəl zınedən.
