Boku hokuməti antikorrupsion mubarizə boçi səmərə dodəni.

Orəxnə manqonədə Boku hokuməti zorə vəsiləon, əsasən Devlətə Əmniyyətə Xidməti bə səlahiyyətinə məmuron əleyh xeyli antikorrupsiya əməliyyaton dəvuniəşe, çand qılə rayoni icra sərdaron , çəvon koməkaron, bənə Sərhədə Xidməti, Mədəniyyətə Vəzarəti, hətto Xariciə Koon Vəzarəti tərkibədə de korrupsiya ittihami həmonə təşkilaton məsuliyyətinə həmkaron dastqir kardışe.

Bə ım fakton hokuməti Kutləviə İnformasiya Vasitəon devləti idarə salem kardəyədə bənə muhummə əməli ğıymət doşone.

 “Qafqaz.ir” saytən bə ım problemi dair ıştə qıley təhlili məğalədə ım tədbiron de musbət tərəfi bahəm, həmən nırəsə cəhətonən ğeyd kardışe. Məğalədə votə bedə ki, Az.R-ədə korrupsiya ciddiə probleme, devləti sistemədə dırozə muddətədəy ki, mevcude və cəmiyyəti zıvonədə əzbəre. Beynəlxalğə dairəonədə ey bənə “rışvəxorətiədə məşhurə keşvər”i zınedən. Dınyo Bankiən ıştə hesabatədə ım fakt etiraf kardəşe.

Haliyədə nati məzənnə erjon bıe, korona virusi bə əməl vardə behrani respublikadə maliyyə və iğtisadiə problemon həniən nığıl kardəşe. Bı səbəbən azəri devlətə səvonon bə iğtisadi korrupsiya, budcə pulon dələmurd kardə fakton de ciddiəti reaksiya doe bino kardəşone. Prezident İlham Əliyevi de korrupsiya mubarizə çe devləti siyasətədə prioritet vəzifə bıe bəyon kardəşe, həmən bı barədə bə vəzifədaron çəşnavi doəşe.

Məğalə muəllif orəxədə bə qıley nəticə omedə ki, devləti vəsiləonədə nıştə məmuron arədə korrupsiya ləğv karde ro de nəticə ne, de çey səbəbi mubarizə barde lozime, bımi ro həmən siyasiə iradə bəpe bıbo. Əlavən vote lozime ki, Əliyev hokuməti ım mubarizə effektin bıe, bə məğsəd rəse, məmləkətədə korrupsiya rişə bırnie çand qılə əsasə amilonku jidastie, ki, be ey hokuməti ım cəhd effekt nibədo. Əvon iminə nubədə devləti usuli-idarədə mevcud rışvə piramida və toyfəbazəti çe arə barde, çəyo, devləti 3 qılə xolə - İdarəkardə, Huğuğə muhafizə və Ədliyyə vəsilon mustəğilə fəaliyyəti təmin karde, iyən bo azad mətbuati fəaliyyəti ro imkan və təminat soxte ehtiva kardedə. Be ım amilon Əliyev hokuməti bə korrupsiya əleyh bardə  tədbiron imitasion təəssurat bə əməl vardedə.