Çe Əliyev hokuməti Almaniyadə lobbi fəaliyyəti nəticəon
Çe Əliyev hokuməti Avropa devlətə və ictimai təşkilatonədə bardə lobbi fəaliyyət 4-5 sore ki, həmonə devləton huğuğə muhafizə orğanon tərəfo təhğiğ bedə, hətto çand kəs devlətə məmur və deputaton bə cinayətə məsuliyyət cəlb bən, çand sorinə zindonə cəzo səşone
Haliyədə Almaniyadə Boku hokuməti bardə lobbiçiəti fəaliyyət çəvrey cəmiyyəti diğğəti mərkəzədəy. Meydan TV çe Feliks Daçsel və Robert Hoftmanni nıvıştə məğalə tərcumədə bə əhandon təğdim kardəşe. Muəllifon bardə muşahidonku jıqo məlum bedə ki, Boku hokuməti bo Azərbaycanə Respublika Avropa məkanədə barzə imic soxte ro bə Almaniya hokumət və parlamenti vəzifədaron xeyli miğdarədə rışvə doəşe. Isət çe hakim Xristian Demokrat İbemoni deputatonədə Karin Strenz, Aksel Fişer və həniən çand kəsi munasibətədə istintağ bardedən. Çəvon de Boku hokuməti arədə əlağon təhğiğ kardedən. “Human Rights Watch” təşkilatiən xeyli almanə deputaton bə Azərbaycanə Respubluka despotik rejimi tərəf ovaşte bənə “bə çəş qıniə təzahuri” ğeyd kardəşbe. Çe kansler Merkeli devlətə katib Thomas Bareib de KOVİD-i mubarizədə bo Azərbaycani lobbiçiəti kardedəbe, Almaniyadə respiratori ğıt bıə vaxti boəvon respirator vığande təkid kardedəbe. Çe Xristianə Demokraton co qıley deputat Olav Quttinqin çand bəjəm bə Boku səfər kardəşe, Əliyev rejimi tərəfdarə qıley azərbaycanıj parlamentədə bə ko peqətəşe, orəxnə 2 sori deklarasiyadə ıştə ğəzənc 450 həzo avro nişon doəşe. Bə ğanuni muvafiğ ey ıştə ım ğəzənci mənbə nişon nıdoe huğuğış heste. Çe paytaxti “Berlin TV” telekanaliən de Boku hokuməti nezə munasibəton hestışe. Təsaduf ni ki, jurnalist Peter Brinkmann bə ım televiziya “Çe Azərbaycani hokuməti kanal” nom noəşbe.
Məğalə muəllifon ımiən ğeyd kardedən ki, Avropada lobbiə fəaliyyət de “Avropa Azərbaycan Cəmiyyəti” vasitə icra bedə. Çey mərkəzi ofis Bokuədəy. 2008 -2018-minə soronədə London, Paris, İstanbul, Berlin, Brussel şəhəronədə de hevujə lobbiə fəaliyyəti məşğul bıə. Çe Fevğəladə Vəziyyəton vəzir Kəmaləddin Heydərovi zoon – Nicat və Tale Heydərovon ım Cəmiyyəti onoeədə yolə xidmətşon bıə.
İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.
