Operativə Ğərorqohi karantinə rejim həmul kardışe
Boku hokuməti Vəziron Kabineti tono Operativə Ğərorqohi mayə manqi 25-minə ruji birifinqədə məlumat doəşe ki, keşvərədə bə koronavirusi mubtəlo bəkəson 1 rujnə miğdar xeyli saru eqıniə, ım tendensiya çe apreli miyonə rujonku dəvomine
Bə “Sputnik Azərbaycan” sayti xəbə əsasən brifinqədə ımən votəşone ki, tosə ısət 2 milyon nəfər peyvənd bıə, çəvonədə 850 həzo kəsi dıminə dozaən jəşe. Respublika prezidenti koməkkar Şahmar Mevsumovi həmonə tədbirədə elan kardəşe ki, çe mayə manqi 31-minə rujiku bə peş karantinə rejimi həmul bəkarden. Ojə həvoədə bə qəvi maska dəğəte ləğv bəbe, bə rayonon ko kardə ictimai nəğliyyati hərəkəti bərpo bəkarden. İyunə manqi 10-ku etibarən bə ibadətə vırəon, ticarətə mərkəzon, plyajon, vərzeş-salemətiə obyekton fəaliyyəti icazə bədon. Əmo bə vərzeşə muəssisəon de kovidə pasporti daxil bıe mumkun bəbe. Bəoməyonədə vəyə və konsertonədə iqlə vaksinasiyaku dəvardə odəmon iştirak karde bəzınen. Çe Mevsumovi ım votəyku məlum bedə ki, Respublikadə Kovidə pasport nominə sənəd tətbiğ bəkarden. Operativə Ğərorqahi həmən elan kardəşe ki, oj bıə obyektonədə ko kardəkəson vaksinasiya sertifikat və ya Kovid pasportşon bəpe bıbo, həmən har həftə istirahətə rujon şəhərdaxili ictimai nəğliyyat hələ ki, ko nibəkarde.
Qurcistoni hokumətiən iyunə manqi 1-minə rujiku ıştə zəminə marzon oj karde bəyon kardəşe. Bə məmləkət daxil bıe ro vaksinə sertifikat və ya 72 saatinə koronavirusə testi mənfi bıe barədə sənəd tələb bedə.
Turkiyə hokumətiən bə Rusiya təklif kardəşe ki, iyunə manq 1-ku dıqlə məmləkəti arədə həvopeyma reyson bərpo bıkardon. Moskva hələ bə ım dəvəti cəvob doəş ni.
Bə Maide.az sayti doə xəbə əsasən 1 manqe ki, çe Az.R 70 nəfər şəhrıvand Dərbəndədə mandə, bə Azərbaycan ovaşte zınedənin. Əvon bə “Qafqazinfo” sayti votəşone ki, Azərbaycani tərəfo i kəsi çəvon har kəsiku 25 həzo rubl muğabilədə sərhədiku ovoştınie təklif kardəşe. Əvonən votəşone ki, çəvonku qirəm anədə pul bıəbe, əvon de həvopeyma bə vətən oəqardin, həni piyodə bə sərhəd boçi omedəbin ki?
İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.
