Operativə Ğərarqohi karantini həmul karde bə əks nəticə səbəb bıe

Az.R Vəziron Kabineti tono Operativə Ğərorqahi keşvərədə karantinə rejimi həmul karde barədə 25 may tarixinə ğəror çe əhali quzəron həniən qıvonin kardəşe

Kokardə odəmonku Kovidə pasporti tələb bıe bey səbəb bıə ki, əhali kullən bo peyvənd je ro nubə qəte məğsədi bə muvafiğ sayt dəşən , ımən bə həmonə sayti dəbie vardəşe bekardəşe. “Sputnik Azərbaycan” sayti muxbir Səbayil rayoni 2 numrəninə poliklinikadə bıə. Çəvrey şebə mudir Qulxar Təğiyeva bey məlumat doəşe ki, i rujədə peyvənd bıəkson miğdar 2 kərə ziyod bıə, çəvon əksəriyyət 20-30 sinnıniə cıvononin.

Mayə manqi 26-ədə Sər vəzir Əli Əsədovi ğəror doşe ki, Respublikadə karantinə rejim tosə avğusti 1-minə ruji dəvom bəkarde. De ım ğərori muəyyən bıe ki, muəssisəonədə kokardəkəsonku Kovidə pasporti tələb iyulə manqi 1-ku məcburi bəbe, məcitonədə odəmon miğdar 50 nəfəri ğədər bənine, iyuni 1-minə rujiku, həmən Respublika daxili həvopeyma peyson bərpo bəkarden, ticarətə mərkəzon ko bino bıboən, çəvon tərkibədə bə əyləncə mərkəzon və kinoteatron fəaliyyəti icazə nibədon, Qurcistoni iyuni 1-ku  ıştə sərhədon oj kardəşe, əmo Azərbaycani tərəfi ıştə marzon hələ dəbastə vəziyyətədə oğəte səbəbiku, Azərbaycaniku bə həmonə keşvər şe-omə hələ ki, mumkun nibəbe. Haliyədə çe Respublikaku bə Qurciston, həmən bə Rusiya  iqlə de həvopeyma şe mumkune. APA sayt nıvıştedə ki, Operativə Ğərorqoh ojə həvoədə bə qəvi maska dəğəte ləğv bıkoən, digər vırəonədə ım tələb hələn ğıvvədəy. İctimai nəğliyyatə vasiton - avtobus, metro, ğətar və taksionədə, sərpuşə vıjoronədə, devlətə binaonədə, fiziki və ya huğuği şəxson ofisonədə, ojə sahəninə istehsalat obyektonədə, məçiton, muzeyon, səhiyyə muəssisəonədə maska dəğəte məcburie. İctimai nəğliyyati istqahonədə, bilet həvatə kassaon, bankomaton və co xidməti obyekton vədə bə nubə mandə odəmonku maska dəğəte tələb bedəni. Devlətə Avtomobil Nəğliyyati Xidmətiən elan kardəşe ki, bə rayonon dəro qıniə sərnişinonku Kovidə pasport tələb nibəkarden. Əmo çəvon temperaturi bəpamuen. Təblarz bəkəson bə avtobus vanıbədon.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.