Ğəfğazi Mısılmonon İdarə məçiton fəaliyyəti barədə ğəror doəşe

Ğəfğaz Mısılmonon İdarə bə Operaivə Ğərorqohi keşvərədə karantinə rejimi həmul karde barədə doə dəsturi əsasən ıştə məsləhəton elan kardəşe

Çimi bə peş məçiton bəpe de termometri, dezinfeksiya məhluli və tibbi maska təmin bıbon. Həmən har ibadətə tədbiri bə peş məçitonədə bəpe dezinfeksiya tədbiron dəvunon. Bə məçiton daxil bıe de kovidə pasporti və bə qəvi maska dəğəte vasitə mumkun bəbe. Məçitədə odəmon miğdar 50 nəfərisən bey bıe əzıni. Bə nomoj oməkəson nomoj orəxəcəğın bəpe məçiti tərk bıkon, omeədə deştə təlis, mıhi, conomoj və nomojə nimdari bəpe bıvardon. Jıqo məhdudiyyəton  sosialə şəbəkəonədə bə bovəninə odəmon etirazi səbəb bıə.

Bə “Ölkə.az” sayti doə məlumati əsasən çe  ĞMİ həmonə iclasədə “Tojə pir” məçiti axund Mircəfər Eyyubovi bə kali məhdudiyyəti ıştə noroziəti izhar kardəşe, “Məşədi Dadaş” məçiti axund Şahin Həsənli isə bımi de  məclisi tərk karde ıştə etiraz nişon doəşe. İlahiyyaçi Elşad Miri de “Sfera.az” sayti musahibədə Respublikadə mevcud vəziyyət de Turkiyə muğayisə kardəşe, votəşe ki, pandemiya vaxti Turkiyədə məçiton həmişə oj mandin, dənıbastışone, odəmon de maska dəğəte və məsafə oğəte şərti har vaxt bə məçit ome, nomoj vote, bə cımmə nomoj qırd bıe imkanşon hestbe. Azərbaycanədə tətbiğ bıə ım məhdudiyyəton nə dini , nəən gigiyenik cəhəto hiç qıley əsas nişe.

Meydan TV-ən xəbə doəşe ki, “Azəriqaz”i idarə “Mehsun Səlim” məçiti rəhbəriyyət bə məhkəmə doəşe ki, məvotbən ə məçit 2014-2015-minə soronədə bəvon 600 həzo mənot ğazə pul qarzoxo mandəybən. Xətai Rayon Məhkəməən bə ğəror omə ki, ım məsələ iğtisadi mubahisəy, bə səbəbən Boku Kommersiya Məhkəmə bəpe bı koy diə bıkardo. Eyən ğeyd karde lozime ki, ım məçit 1916-minə sori milyoner Mehsun Səlimi inşa kardəşe bə qorə bə çey nome. Həmən bənə tarixiə abidə Mədəniyyət və Turizm Vəzarəti balansədəy.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.