Saatlı rayoni Azadkənd diy məktəbi bina rıjidə.

Saatlı rayoni Azadkənd diy məktəbi bina 1972-minə sori inşa kardəşone. Tosə ısət hiç vaxt təmir bıə ni. Çand sor bə nav voə-voş bə sinifon dılə tıkedəbe, əve məcbur mandin çey kum tojə kardışone

Əmo məktəbi bina divoon təkən, kali vırədə həviən, bitoni tərəfədə pusnə dəhaştəşone ki, nırıjio. Muxtəlifə vaxtonədə Saatlı rayoni icra hakimiyyətiku, rayoni Təhsilə şebəku, hətto çe Respublika Təhsilə Vəzarətiku omən, bə ım rıjiə məktəbə bina nəzər səğandəşone, təəssuf ki, əvonən Azadkəndədə tojə məktəbə bina inşa karde məsələ devləti səviyyədə bə səhmon eğande zınəşonni. Çand manq bə nav Fevğəladə Halon Vəzarəti numayəndonən omən, məktəbi xətomandə holədə bıe təsdiğ kardəşone.

 Diy əji Xalid Cabbarovi de Meydan TV muxbiri qəpədə izhar kardəşe ki, əvon çand sore hokumətiku diədə tojə məktəbə bina dute xahiş, hətto tələb kardedən. Əmo tosə ısət hokuməti qıley vəsilə bə meydon beşə ni ki, ım problemi həll karde ğıvvədə bıbo. Haliyədə məktəbi qıley divo rıjiə. Rayoni numayəndəon bə ım vəziyyəti diə kardəşone, bə ğəror omən ki, çe bina həmonə rıjiə hissə təcrid bıkardon, əyo dərs dənıvardon, məktəbi səlomətə hissədə dərson bə 2 nubəninə rejim ovıştonon. Hərçənd ki, bina umumən bərbod vəziyyətədəy, kəybə-pencəonış arşiə, tosboniə sistemış ni. Soveti vaxtonədə sinifon de sığə zeveli tosbonidəbin. Mıstəğıləti bə peş ovaştən bə ezımə piç. Ezımiən valideynon deştə puli sedən, və ya şaqirdon çe kəyku vardedən.

Diy sakinon çe rayoni icra hakimiyyəti sərdar Elmir Bağırovikuən norozin. Votəşone ki, əv cıvonə kadre, elmon doktore, devləti co vəzifəonədən ko kardəşe. Əmo bə Saatlı rayon təyin bıeku əhali çey tərəfo hiç qıley  musbət ko vindəş ni. Rayoni həniən çand qılə diy məktəbon bərbod vəziyyətədən. Bə vəzifə təyin bıeku tosə ısət Elmir Bağırov rayoni hiç qıley problemi həll karde ro jəğo qıley təşəbbus nişon doəş ni. Diy əji Azər Hacıyeviən ğeyd kardəşe ki,  məktəbi mevcud vəziyyəti barədə şikat bə Təhsilə Vəzir Emin Əmirullayevi “Fasebook” səhifə, və bə Vəzarəti elektronə muraciətə adres vığandəşone. Çəğono çəvob omə ki, çəş bıkən, keynə ğəror ğəbul bıbo, bəvədə bə diy camaati muraciəti ətrofinə cəvob bədon.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.