Az.R məktəbonədə dərson keynə bino bəben.

Dəvardə rujon Az.R Təhsilə vəzir Emin Əmrullayevi mətbuatə konfrans dəvuniəşe, elan kardəşe ki, keşvəri məktəbon ibtidai, yəni 1-ku bə 4-minə sinifonədə dərson sentyabri 22-ku əyani formədə bino bəbe.

Penə sinfi şaqirdon isə i həftə di, yəni çe sentyabri 29-ku bə dərson bino bəkarden. Ali və miyonə ixtisasə muəssisəonən bı rujədə bə əyaniə tədrisi umjən bəqənien.

Respublika Kutləvi İnformasiya Vasitəonədə de tojə tədrisə sori bino bıe əlağədar məktəbonədə neqativə holon barədə xəbəon dərc bedən. “Rubrika.az” sayt  Minqəçevir şəhəri 11 numrəninə məktəbi direktori ğərəzkarə hərəkətonku nıvıştəşe. Məğaləku məlum bedə ki, əv dərson çe muəllimon arədə bərobər baxş kardedəni, ki bey rışvə dodə , bo ey vey dərsə saat co kardedə. Imi bey irad qəteədə votedə ki, jıqo dəstur bey şəhəri Təhsilə Şebə mudir Zamik Cəbiyevi doəşe. Həmən bə norozi mandəkəson eyham jedə ki, çey penə vəzifədə ko kardə himayədarış heste, hiç kəsi bey zuş əvışkıni.

Eynən jıqo vəziyyət “Reportyor.info” sayti çe Sumğayıti 3 numrəninə məktəbədə mevcud bıe təsvir kardəşe. Muəlləmə Aynurə Tahirova ce məktəbi i qrup muəllimi nomo bə sayti şikayətə məktub vığandəşe, əyo çe məktəbi direktor Sevda Əliyeva rışvəxorə əməlon təsvir kardəşe. Nıvıştəşe ki, Əliyeva 2 sore ki, bə çəvon məktəb direktor təyin bıə. Tosə ey məktəbədə bo 30 saati dərsi se ro 500 mənot rışvə dodəbin. Əv  ım rışvə məbləğ bə 1500 mənot ros kardəşe. Bə çey jıqo hərəkəton etiraz kardeədə votedə ki, əv ıştənbəsə ni ki ım hərəkəton bıkardo, çey peştədə Sumğayıt şəhəri icra sərdar Zakir Fərəcov və Təhsilə Şebə mudir Arzu Alızadə mandedən, de çəvon dəsturi əv hərəkət kardedə, həmonə pulonən bəvon dəvunidə. Aynurə Tahirova həmən nıvıştəşe ki, ım Sevda Əliyeva sıftə şəhəri 2 numtəninə məktəbi direktor ko kardedəbe. Çey jıqo dələdızdə hərəkəton həmonə məktəbi kollektivədə qıley mərəşulə bə əməl vardışe, çey peştəvonə barzə vəzifədaron məcbur mandin əvşon bə 3 numrəninə məktəb ovoştonie. İyoən əv bə həmonə məmuron arxayine ki, ıştə bə muəllimi layığ nıbə hərəkəton dəvom kardedə.

İyo jıqo qıley vəziyyəti ğeyd karde bə vırə eqınedə ki, çanədə keşvərədə hakimiyyət çe  i qılə toyfə dastədə bıbo, usuli idarən bə həmonə toyfə mənafe xidmət bəkarde, devləti ğanunonən hojo koğəzi səpe bəmande, xalği soyə zəhmətkəşə odəmon isə həmonə toyfə istismariku rəxe nibəznen.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.