Difaiə Xətt: Boku hokuməti beğanuniə hərəkəton həniən ziyod bıə.

“Difaiə Xətt” huğuğə mudafiə təşkilati keşvərədə bardə avğustə manqi monitorinqi nəticə elan kardəşe.

Çe ım hesabatiku məlum bedə ki, Boku hokuməti tərəfo şəhrıvandon huğuğ və azadion darışte, çəvon şərəf və ləyağəti mudafiə imkanon məhdud kardə fakton, hokuməti əhatə kardə korrupsiya meylon həniən hevuj bıə, polison tərəfo zor tətbiğ kardə hərəkəton kutləvi xarakterədə bıən, hətto məhkəmədə polison bə vəkil Coşqun İskəndərovi divon qətəşone, əv kuəşone. Sənədədə ğeyd bıə ki, bə məhbuson işqəncə doə əməlon, dəvon ğeyri-insoniə rəftoron ijən dəvom kardəşe. Boku 1 numrəninə təcridxonədə ənəhardə aksiya elan kardə 11 nəfər məhbus bə kars dənoəşone, de zənciri bə çarpayi lınqə dəbastəşone, əvon xeyli muddət bə lınqəro şe imkaiku məhrum kardəşone. 8 numrəninə zindonxonədə bə dini məhbus Abbas Huseyni ijən işqəncə doəşone.

“Difaiə Xətt” de təəssufi ğeyd kardedə ki, polison tərəfo dindaron bə şiddəti məruz mande dəvomış heste, əvon bə Aşura mərasimon dəvunie imkan doəşon ni, çe İslamə Partiya sədri muavin Hacı Mehdi Şamilli bə 10 sutka muddət zindonə cəzo məhkum bıə.

“Bə Azərbaycani Siyasi Məhbuson Azadi” təşkilati ki, Avropadə ğəror qətəşe, sentyabri 1-ədə Respublika zindononədə siyasiə məhbuson 122 nəfəro ibarət tojə siyahi elan kardəşe. Im təşkilati iyunə manqədə elan kardə siyahiədə 121 nəfəri nom hestbe. Çə vaxtiku 3 nəfər bə azadi beşə, 4 nəfər tojə odəm məhkum bıə ki, çəvonədə qıley dini fəal Razi Humbətove.

Az.R-ədə fəaliyyət nişon doə huğuğə mudafiəkaron isə cəmi  38 nəfəri  bənə siyasiə məhbuson zınedən. Əvon əsasən de hokuməti həmkarəti tərəfdarə odəmonin. Çəvonədə Novella Cəfəroğlu bə “Yeni Musavat”i doə musahibədə Avropa huğuğə mudafiəkaron, əsasən Leyla Yunus ğərəzkar hisob kardəşe, votəşe ki, “ey Azərbaycan və çey xalğış pidəni, bı səbəbən hiç vaxt bənə əmə dılısoxt ko kardedəni, məğsədış əve ki, kali təşkilatonku qrant bısəno”.

Bə Meydan TV doə məlumati əsasən dəvardə sori bə Avropa Bəşəri Huğuğon Məhkəmə çe Az.R-ku 525 qılə şikayət daxil bıə. Umumən isə ım məhkəmədə çe ım respublikaku daxil bıə 2100 şikayət heste, Avropa Məhkəmə çəvon barədə ğəror doənine.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.