Boku hokuməti Kopona məhdudiyyət ğismən çe arə peqətışe.

Vəziron Kabineti tono bə Korona pandemiya dair Operativə ğərorqohi ıştə tojə ğəror elan kardəşe. Respublika Kutləviə İnformasiya Vasitəon ım tojə qaydəon bə cəmiyyəti nəzə rosniəşone

Məlum bıə ki, çe oktyabrə manqi 1-minə rujiku keşvəri ictimai nəğliyyaton səpe noə məhdudiyyəton ləğv bəkarden. Tosə ısət həftə orəxnə 2 rujədə şəhəri ictimai nəğliyyaton, metroən daxil, ğeyrəz taksion, ko karde ğədəğən bıe. Operativə ğərorqohı ıştə ım əvəzon de muvəffəğiyyətinə vaksinasiya prosesi izah kardəşe. Həmən ğəror heste ki, istirahətə və əyləncə mərkəzon fəaliyyət tam bərpo bıbo. Im ğəror bə mədəniyyətə obyekton, kino və konsertə zalon, teatron fəaliyyətiən aide, əmo də şərti ki, həmonə zalonədə vırəon 50 faizisə vey pur nıbon və tosə şanqo saat 24 təmomi ıştə koy bəpe dəparçınon. Bə ım obyekton təşrif vardə har 18 sinnisə bə pe odəmon Kovidə pasportşon bənine. Əks holədə polison həmonə muəssisə rəhbəriyyəti tosə 5 həzo mənot cərimə karde səlahiyyətşon heste. Kovidə pasporti zərurət bə rayonon ko kardə avtobus və osınə roy nəğliyyati 18 sinniku bə pe sərnişinonən aidiyyət hestışe. İyo bo Boku, Sumğayıt və Abşeron rayonədə ko kardə nəğliyyati sərnişinon istisna heste. Yəni Operativə Ğərarqohi doə dəsturi ım hissə bə ım 3 qılə məntəğə arədə hərəkət kardə sərnişinon aid ni. Maska dəğəte, bə sosialə məsafə riayət karde və həniən co məhdudiyyəton hələən ğıvvədəy, bə ım məhdudiyyəton əməl nıkardə fiziki və yuridik şəxson yolə miğdarədə cəriməon, və ya inzibati ğaydədə məsuliyyət çəş kardedə.

Kovidə pasporti çe əhaliku kulli ğaydədə tələb karde, ım sənədi de rışvə roy bə dast varde tələbat bə meydon vardəşe. Imən bey səbəb bıə ki, Respublika kali səhiyyə muəssisəonədə soxtə kovidə pasporton həvate fakton xeyli ziyod bıə. Çe Sər Prokuratura bə “Sputnik Azərbaycan” sayti doə xəbəku məlum bedə ki, huğuğə muhafizə orğani həmkaron Boku şəhəri 20 numrəninə poliklinikadə, Osınə poy Mərkəzi mərizxonədə, Abşeron rayoni Mərkəzi mərizxonədə , Mehdiabad Aliə Saleməti Mərkəzədə soxtə  Kovidə sənədon bə 200-250 mənoti muğabilədə həvate fakton bə oşko bekardəşone, çand nəfər tibbi koəkon bə məsuliyyət cəlb bıən. Jıqo fakton keşvəri co rayononədən faş kardəşone.

İbrimi Zahirəddin, çe Rusiya Yekatrinburğ şəhəriku, İİR sədo, tolışi radio.