Karantinə məhdudiyyət bə tojə problemi səbəb bıə.

Bə Operativə Ğərorqohi təsdiğ kardə qaydon əsasən çe oktyabrə manqi 1-minə rujiku Kovidə pasport nıbə odəmon bə ictimai nəğliyyat vadodənin. Boku Beynəlxalğə Avtovağzali dəşəsədə muhafizə sistem onoəşone

Əyo həmonə pasport nıbə şəxson bə avtovağzali ərazi vadodənin. Çimi muğabilədə taksi xidməti ıştə ğıyməton boho kardəşe. Çunki Kovidə pasport çe avtobusi sərnişinonku tələb bedə. Im məhdudiyyəti bə taksi sərnişinon aidiyyətış ni. “Sputnik Azərbaycan”i  bə ım problemi dair paytaxti avtovağzaliku qıley reportaj hozo kardəşe. Məlum bıə ki, bə rayonon sərnişin kırniə taksi soybon 15 mənotinə xidmət ısət  bə 20 mənot ros kardəşone. Çunki bə taksion ehtiyac eqıniə odəmon miğdar xeyli vey bıə. Avtobusi əromon isə behrani dılədən. Şofer Arzu Əsqərov Boku- Tərtər istiğamətədə sərnişin kırnidə. Bə muxbiri izah kardəşe ki, çey idarə kardə avtobus 45 nəfər qətedə. 40 dəğiğədə cəmi 1 nəfər sərnişinış heste. 50 dəğiğə bədiqə bəpe bə reys dəro bıqıno. Jıqo bışo cəmi 10 kəs sərnişin bəzu qırd karde bəzıne. Bə Boku omeədən cəmi 20 qılə sərnişinış hestbe. Hərcənd ki, çey reysi şe-omə iqlə sutemoni xarc 220 mənote. Bı səbəbən qirəm kafi ğədər sərnişin qırd nıbo, əv çe reysiku imtina bəkarde. Ayaz nominə şofer isə Boku –Lankon istiğamətədə de avtobusi sərnişin kırnidə. Votedə ki, Kovidə pasporti iqlə bə avtobusi sərnişinon aid bıe, əmo bə taksi sərnişinon aid nıbe vey təəccub vardə koe. Məgər taksiədə korona virus sirayət karde zınedəni, iqlə avtobusonədə fəaliyyətış zumand bedə?

Devlətə Avtomobilə Nəğliyyatə Xidməti mətbuatə katibi bə muxbiri parsi cəvobədə təsdığ kardəşe ki, kovidə pasporti tələb sərnişinon miğdar xeyli kam kardəşe. De taksi bə rayonon səfər kardə odəmon rodırozi postonədə təftiş bəkarden, kovidə pasport nıbəkəson cərimə avjor karde məcburiyyətədə bəmanden.

Məlume ki, vaksinasiya bə əhali 18 sinniku bə pe odəmon tətbiğ bedə.  Mərkəzi Vıjniə Komissiya elan kardə orəxnə məlumatku oşkoe ki, məmləkətədə əvıjnon, yəni 18 sinnisən vey bıəkəson miğdar 5 milyon 213 həzo nəfəre.  “Big.az” sayt bə Operativə Ğərarqohi oktyabrə manqi 2-minə ruji doə məlumati istinadən nıvıştedə ki, iminə mərhələ peyvənd jəkəson miğdar tosə 4 milyon 800 həzo nəfəriey ki, ımən məmləkəti peyvənd bəninə əhali  92%-i təşkil kardedə. Əqər keşvəri əhali 92% peyvənd bıəbu, bəs bə rayonon sərnişinkırniə nəqliyyati koədə jıqo behrani səbəb çiçe? Həmən Operativə Ğərərqoh Kovidə pasporti tələb boçi bə Boku, Sumğait və Abşeroni sərnişinon aid nıkardışe? Yəğin ki, ğərorqohi həmkaron ıştə bə peyvəndi dair doə rəğəmon soxtə bıe çok zınedənbən.

İbrimi Zahirəddin, Çe Rusiya Yekaterinburğ şəhəriku, İİR sədo, tolışi radio.