Çı Azərbaycan Respublika Ərbəini zəvvaronku oxonə xəbə.

Çe Ərbəini ziyarətiku oqardə 40 nəfər zəvvar 3 ruje ki, Ostoro kemrukə posti ovaşte zınedənin. Əvon bı həxədə bə Sputnik Azərbaycani xəbə doəşone.

Zəvvar Ceyhun Mirhəşimovi qəp jəşe ki, sentyabri 23-də 62 nəfər zəvvar de “Karvan” turizm şirkəti Xəyyam nomədə həmkari vasitə çe Naxçıvaniku bə Turkiyə, çəyoən çe Habur kemrukə  postiku bə İraq, sentyavri 27-ədə bə Kərbəlo daxil bıən. Ziyarəti bə peş Xəyyami əvon de omə roy ne, de İrağ –İron sərhədə posti ovaşte vasitə bə Nehrəm ovaştə məntəğə vardəşe, çəyoən vığandışe bə İroni Ostoro marz ovaştə məntəğə. İyo İroni tərəfi əvon bemaneə sərhədiku vadoşe, əmo Az.R tərəf əvoni bə Vətən vadodəni, çəvonku bə keşvər daxil be ro kod tələb kardedə. Həmonə Xəyyamən bə telefoni həni  cəvob dodəni. Kiku pul hestbe oqardin, de Culfa posti ovaştin bə Naxçıvon. Əmandə 40 nəfər zəvvariku bə dumo oqarde ro anədə pul ni. Isət əvon mandən çe İroni de Azərbaycani marzi arədə, vo-voşi jitono. Telefonon limitən orəxə, deştə nezə odəmon əlağə oğəte imkanikuən məhrumin.

Sayti muxbiri  de ım fakti otırnie məğsədi bə Xəyyami , həmən bə çey ko kardə “Karvan” şirkəti zanq kardəşe , əmo dəvon əlağə baste mumkun bıə ni.

Devlətə Kemrukə Komitəku votəşone ki, bəpe sıftə bə həmonə zəvvaron pasporti çe marzəvonon peçat bıqıno, yəni bəpe bəvon sərhədi dəvarde icazə bıdon, çəyo Kemruki həmkaron çəvon bə vətən daxil bıe məsələ həll karde ixtiyarədə bəben.

Devlətə Sərhədə Xidmətiiən ım məsələ çe Vəziron Kabineti səpe həvolə kardəşe, votəşe ki, ım təsisat bəvon bə vətən daxil bıe icazə dodəbu bə Sərhədə Xidməti bı barədə kod vığandənine. Çey bə peş həmonə şəhrıvandon sərhədi ovaşte məsələ musbət həll be bəzıne.

 Boku hokuməti bəştə şəhrıvandon jıqo zulmkarə munasibət nişon doe iminə kərə ni. Çe Rusiyaku marz ovaştə Dərbənd məntəğədən vəziyyət ım ğədər beysurə holədəy. Ponə sori həmonə məntəğədə bə əməl omə beaburə vəziyyəti həxədə iqlə Respublika Mass-Media ne, çe Rusiya Kutləviə İnformasiya Vasitəonən muntəzəm xəbəon pevolo kardedəbin.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.