De Nardarani hadisə əlağədar diqər məhbuson məhkəmə bino bıə
Fevralə manqi 2-ədə de Nardarani hadisə əlağədar dəstqir bıə məhbuson 2 qılə məhkəmə bino bıə. Boku Qonə Cinayəton Məhkəmədə Hacı Zulfuğar Mikayılzadə və çey 11 nəfər həmməsləkon - Seyid Elman Ağayev, Eldar Bunyadov, Mehman Ğuliyev, Elxan Həsənov, Ramin Seyfullayev, Ruzi İsmayılov, Cabir Əliyev, Faiğ Allahverdiyev, Əli Huseynov, Mehman Məmmədov və Mubariz İbrahimovi məhkəmə iclas dəvuniəşone.
"İslamazəri" bə Meydan TV əsasən xəbə dodə ki, bı iclasədə Elxan Həsənov, Elman Ağayev, Zulfuğar Mikayılov və çəvon vəkilon qəp jəşone. Votəşone ki, Elxan Həsənov Nardarani faciə vaxti məmləkətədə bıə ni, dekabri 11 -ədə çe İrono oqardə bəpeşt dəstqir kardəşone. Bə Elman Ağayevi qonə işqəncə doəşone, ə rizon tosə ısət çey bədənədə hələən mandə. Bə Zulfuğar Mikayılzadə kə polison tərəfo kisonədə jı-çi kırnie bə video kamera eqıniə. Məhkəmə bəpe ım fakti təhğiğ karde çı istintağiku tələb bıko. Lankoni İcra hokuməti sərdar Taleh Ğəraşov çe Lankonıjə məhbuson həxədə puriftiraninə xosiyətnamə bə istintaği təğdim kardəşe. Bə qorə əv bəpe bə məhkəmə bo, ifadə bıdo. Məhkəmə iclas fevrali 6-ədə dəvom kardənine.
Həmonə ruji 2-nə məhkəmə, Nardarani Siprişon Şura sədr Natiğ Kərimov və AİP sədri muavin İnğilab Əhədovi muhakimə de devləti sirron vonə edoəcoy dəvardə. Əvoni de xarici xidmət orğanon həmkarətiədə ittiham kardedən. "Azadlıq.org" nıvıştedə ki, Məşədi Natiği bə jurnaliston votəşe ki, məhkəmə sırri oj karde ixtiyar nişe. İ qılə ımi vote bəzıne ki, məhkəmədə bey doə ittiham bıhtone, ey hiç qıley qıno nişe.
Nardarani hadisə məhbuson 2 -minə qrup ki, Mısılmonon İbemonə Hərəkati sədri muavin Elçin Ğasımov və çey 11 nəfər həmməsləkon muhakimə bedən, çəvonədə Vusal Alışovi bə beynəlxalq təşkilaton və xarici səfarəton muraciət vığandəşe və xahiş kardəşe ki, əvon məhkəmə iclasonədə iştirak bıkon, Boku hokuməti bəştə beqınoə şəhrvandon munasibətədə vəhşiə hərəkəton şoyd bıbon.
