Yunis Səfərov ijən ənəhardə aksiya elan kardəşe

Yanvarə manqi 26-minə ruji Yunis Səfərovi və dey i vırədə muhakimə bıə 11 nəfəri apelyasiya məhkəmə dəvom kardəşe. Səfərovi ıştə votemonədə bəyon kardəşe ki, 3 ruje ənəhardə aksiya dəvunidə

“Kontakt.az” sayti  xəbə doəşe ki, vəkil Bəxtiyar Hacıyevi çey ım hərəkət jıqo izah kardəşe: “ Yunis Səfərov hisob kardedə ki, məhkəmə de Qəncə hadisəon əlağədar məhkum bıə şəxson barədə beədalətinə hukm bekardəşe. Çunki həmonə odəmono hiç kəs dey bahəm bə Vəliyevi həmlədə iştirakşon bıə ni. Həmən çəvon hiç qıleyku silahən bıə ni. Məhkəmə iclasədə iştirak kardə məhbusonən votəşone ki, hiç qıley qıno nişone, bə çəvon munasibətədə elan bıə ittihamon tamam beəsosin.

Boku məhkəmə ğeyri-ğanuni məhkum kardə qıley siyasiə məhbusən jurnalist Polad Aslanove. Eyən çe yanvarə manqi 6-minə rujiku, yəni 21 ruje ki, ənəharde elan kardəşe. Çey jimoni həmro Qulmirə Aslanova bə Azadi radio məlumat doəşe ki, yanvari 23-də Poladşon bə Penitisiarə Xidməti Mualicə Muəssisə ovoştıniə. Ey yanvari 24-də dey vindemon kardəşe. Doktoron izah kardəşone ki, Poladi vəziyyət xeyli qıvonine, daim tibbi muşahidə jitonoy, qirəm çey səhhətədə holyət karde xəto bə əməl bo, bəvədə doktoron bey məcburi ğida ğəbul kardovniə tədbiron tətbiğ karde məcburiyyətədə bəmanden. Qulmirə xanımi ımən ğeyd kardəşe ki, Polad ıştəni qınokar zınedəni ıştə cinayətə koy sənibəton təhğiğ bıe tələb kardedə. Ey Poladiku ım aksiya dəparçınie xahiş kardəşe, əmo əv rozi bıə ni.

Bı muddətədə Ombundsman Apparati həmkaronən çe Polad Aslanovi tono şən, de çey vəziyyəti oşno bıən.

Penitisiarə Xidmət və co rəsmiə təşkilaton de ım məsələ əlağədar ıştə munasibət hələ ki, izhar kardəşon ni.

Ali Məhkəmə bə Polad Aslanovi şikayəti diə kardə iclas bə fevralə manqi 3-minə ruj təyin kardəşe.

“Xeberman.com” sayti redaktor Polad Aslanov 2019-minə sori iyunə manqi 12-ku zindonədəy. Boku məhkəmə əvış de bə devləti xəyanət ittihami bə 16 sornə zindonə cəzo məhkum kardə.  “Bemarzə Reportyoron” və həniən co beynəlxalğə huğuğə mudafiə təşkilaton Polad Aslanov bənə siyasiə məhbusi zınəşone, Boku hokumət vanq kardəşone ki, ey ozod bıkardo.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.