Putin iyən Paşiniyani telefoni rabitə.
Azərbaycan Respublika hərbiçion bə Rusiyə sulhmərominə ğıvvon nəzorəti jiədə bıə məntəğəon həmlə barədə Ermənistoni i minnə vəzir de Rusiyə prezidenti suhbətış karde.
Bə Armen Pres sayti raporti əsos, Paşiniyan həminə votımonədə çı Ğərəboği behroninə vəziyəti illəti Azəri hərbion tojə həmlə iyən beğanunə koon elanış karde və bə məntəğəku Azərbaycan Respublika hərbiçion bə dumo pıkırniye tələbış karde.
Bə Ğərəboği muxtar Respublika məlumat ərosnə mərkəzi tojə raporti əsos, Azəri hərbion tojədən bə Ğərəboği Parux məntəğə həmlə kardəşone ki de sulhmərominə ğıvvon əməliyoti dim bə dim bıə.
Jığo vote bıdə ki həminə həmlə nəticədə 14 nəfər çı Ğərəboği bandiyə məntəğə hərbiçion zəxmin bıən ki çəvonku 2 nəfəri hol-əhvol çok ni.
Miladi 2020 minnə sori Oktiyabrə manqədə Azərbaycan Respublika vey hevuj iyən həmmə tərəfinə əməliyati bo Ğərəboği məntəğəku Ermənion xaric karde və işğal bıə ərazi ozodəti xoto bino kardışone.
Azərbaycan Respublika 44 ruj canqi bəpeşt muvəffəğ bıə təğribən 3500 kilomiter çı Ğərəboği ərazi əcumlə 132 kilomiter çı İroni sərhəd nezi məntəğon ozod ko.
