Kaspi dıyoədə bo natəvonon jimoni xəto heste

Az.R Natə Şirkəti bə fəhlon jimoni beetina munasibəti həxədə mass- mediadə vey nıvıştə bıə. Əmo şirkəti rəhbəriyyət bə ım tənğidi hiç məhəl nodə ni. Bı rujonədə Natəvonon Huğuğon Mudafiə Komitə sədr Mirvari Ğəhrəmanli bə "Modern.az" sayti votəşe ki, Kaspi dıyoədə 300 nəfər natəvonon ki, 15 rujnə nubəşon orəxə və bə kə oqardəninin, həvo kulok be səbəbiku əvoni bə dıyokəno varde inkan ni.

Bı barədə natəvonon bey məlumat doəşone. Ey həmən ğeyd kardəşe ki, "Britiş Petrolium" bə  ıştə həmkaron əmniyyəti tənəvəc mandedə, əvoni vaxtədə təxliyyə karde ro muasir nəğliyyat vasiton inşa kardəşe. Əmo SOCAR  bo ıştə fəhlon jimoni əmniyyəti ro jəqo imkanon soxtedəni. Çey kəştion kulokə həvoədə ləpə 1 m beədə bə dıyo beşe zınedəni. Im şirkəti təchizat çe xarici şirkətonsə xeyli sarue. Çey rəhbəriyyət bə natəvonon jimoni ğıymət nodəni.

"Azneft" İstehsalat ibemoni rəsmi şəxs Vurğun Həsənli  fəhlon dıyoədə mande fakt təsdiğ kardəşe. Votəşe ki, həvo şərait fəhlon bə kəno varde imkan dodəni. Ləpə barzi bə 2-3 metr rəsedə. Jıqo həvoədə kəştion bə dıyo beşe bə faciə səbəb be bəzne. Munasib şərait bəcəğin kəştion bəşen əvoni bebəkan bə dıyo kəno.

"Azadlıq radiosu" Natəvonon Huğuğon Mudafiə Təşkilati hesabati nəticon elan kardəşe ki, orəxnə 7 sorədə, yəni 2010 -2016 -minə soron dırozi  Kaspi dıyoədə çe Azərbaycani 130 nəfər natəvon həlok bıə. Çəvonədə 104 kəs çe SOCAR - i həmkaronin. Şirkəti rəhbəriyyət anədə ğəzonku  hiç qıley nəticə bekardedəni, fəhlon əmniyyəti təmin karde ro hiç qıley əməli ko vindedəni.