Tırkiyə iyən Ermənistoni yolon miyono telefoni votımon.
Tırkiyə prezident iyən Ermənistoni i minnə vəzir bə 2 qılə kişvəri miyono əloğəon normal kardey təkid kardışone.
Miladi 2020 minnə sorədə Ğərəboği 44 rujə canqədə Azərbaycan Respublikaku, Tırkiyə siyasi və hərbi hevujə himoyə dumoədə, Ankara iyən İrəvani rabitəon kəm bıə. 3 tərəfiyə bəyoniyə nomo bıə otəşbast təvafuğnomə bəpeşt ki de Rusiyə vositəçiyəti əncom bıə be, Buko, İrəvan və Ankara ıştə rabitəon de yande normal kardışone. əmmo koşınason həm bənə ım 3 qılə kişvəron rəsmi şəxson, ım rabitəon çok bey rə, çok zınəşon ni.
Həminə şəroyetədə, zinə Tırkiyə prezident, Rəcəb Təyyeb Ərdoğan de Ermənistoni iminnə vəzir, Nikol Paşiniyan telefoni votımonış kardə.
Bə Fars aqentiyəti raporti əsos, 2 qılə kişvəri yolon nəzəşon heste ki məntəğədə sulh iyən stabiləti zumand kardeyro, bəpe rabitəon normal kəmon.
Bə Tırkiyə prezidenti dəftəri bəyoniyə əsos, Ərdoğan iyən Paşiniyan tələbışone ki 2 qılə kişvəri miyono İyolə manqi 1 minnə təvafuğaton icra bıbu, ım bəyoniyədə bə əncom bıə təvafuğaton detalon işorə nıbıə.
De ım vıcud ki Ankara iyən İrəvani miyono rabitəon normal kardeyro vey cəhdon əncom bey holədəy, Ermənistonədə qıləy referendomi nəticə nışoş do ki Ğərəboğ canqədə, Bukoku, Ankara himoyəon, Ermənion yodiku şedəş ni, bə həminə nəticəon əsos, Ermənistoni millət ıştən vey asliyə deşmən, Tırkiyə kişvəri zıneydən.
