"Fatimeyi-Zəhra" məçiti ətrofədə hesıbes dəvom kardedə

Bə Dini Təşkilaton dair Devlətə Komitə çe "Fatimeyi-Zəhra" məçiti 1 hektar zəmini çey dasto se barədə ğərar bə məmləkəti dini ictimaiyyəti etirazi səbəb bıə. İlahiyyatşunas alim Haci İlqar İbrahimoğlu bə Ğəfğaz Mısılmonon İdarə sədr şeyxulislam Haci Allahşukur Paşazadə video-müraciət vığandəşe. Im muraciət sosial şəbəkonədə pevolo bıə və cəmiyyətiədə musbət rezonans bə əməl vardəşe. Haci İlqari votəşe ki, tarixi dırozi xalqı həmişə bə məçiton das dəhaştəşone, har vırədə əv bərğəror kardəşone.

İslamə həmrayəti sorədə, həmən Həzrəte Fatimə Səlamulla Əleyha əyyamə rujonədə  "Fatimeyi-Zəhra" məçiti vəqf zəmini çey dasto se barədə ğəror çe inom əhli dılon dojnidə. Boku islamə mədəniyyəti paytaxt elan bıə sorədən ıyo məciton oçınidəbin. Əv Seyxulislamiku xahiş kardedə ki, bı koədə koməq bıko ki, məmuron ıştə ım ğeyri-ğanuniə əməliku dast bıkəşon.

Eyən bıvotəmon ki, 2009-minə soriən ki, Boku hokuməti ım məçiti oçınie nısığ hestbışe, Hacı İlqari bə Seyxi müraciət kardışe, im ko çe Prezidenti müdaxilə nəticədə müsbət həll bıe.

"İslamazeri.az" xəbə dodə ki, fevrali 10, cımmə ruji xutbədə "Fatimeyi -Zəhra" məçiti imom cımmə Ramil Bədəlovi votəşe ki, Tojə Qunəşli ğəsəbədə 50 həzo əhali jidə.  Çəvon i qılə "Fatimeyi-Zəhra" məçit hestışone. Dini mərasimə rujonədə ım 1 hektarə əraziədə əhali ıştə dini-mənəvi tələbaton icra kardedən. İm zəmini çe məçiti dasto se bə anədə əhali huğuğon ğəsd, əvoni çe ım imkaniku məhrum kardeye. Sayti həmən Əhlibeyti sair Haci Elşən Xəzəri bə "Fatimeyi-Zəhra"məçiti həsr kardə qıley ibrətamiz şeri bəştə əhandon nəzə rosniəşe.

Vəkil Cavad Cavadoviən "Fatimeyi- Zəhra" məçiti ərazi çey dasto se bə Az.R Konstitusiya zidd qıley əməl hisob kardəşe.