İroni ədliyə vəzir bə Azərbaycan Respublika səfərış kardə.

İroni ədliyə vəzir de Azərbaycan Respublika məhkəmə və icra iyən dıvləti rəsmion mıloğat karde xoto ijən çandə məhkəmə sahədə həmkarion inkişof doe barədə muzakirə karde qoronə bə Azərbaycan Respublika səfərış kardə.

İroni ədliyə vəzir Mustəfa Purmuhəmmədi ımrujnə sıbi faxti Buko Airportədə bə jurnaliston voteşe: qıləy vəziyətədə çandə 2 qılə kişvəri miyono həmkarion hestin ki bo həminə həmkari və əloğəon ziyod kardero məhkəmə sahədə zəminəon və himoyəon hozzo karde lozime.

İroni ədliyə vəzir omidvar mandə ki 2 qılə kişvəri miyono həmkarion bə inkişof bırəsi və həmkarion ziyod karde boiys bıbu, məxsusən iğtisod və məhkəmə sahədə.

Purmuhəmmədi bə İroniıjə ticarət məydonədə koəkəyon və fəalon məhkəmə cəhətiku himoyə karde və de Azərbaycan Respublika ğanunonku oşno ne bey xoto nohəx dəstqir bıə İronıjon ozod karde barde muzakirə kardeyo çın səfəri co hədəfon hisobış kardə.

Əv əlovəş kardə ki: səy bəbe ta Azərbaycan Respublikadə İronıjə məhbuson ijən İronədə həbs bıə Azərion vırə bə vırə bıbon ta bo ıştə həbsi ıştə kişvərədə idomə doero zəminəon hozzo bıbu.

İroni ədliyə vəzir ım 2 rujiyə səfərədə çandə de Azərbaycan Respublika rəsmion muzakirə karde bə kəno çın kişvəri idari və məhkəmə sahədə vırəonku həm diyə bəkay.