Beynəlxalqə huğuğ mudafiə təşkilaton bo Nardarani hadisə məhbuson azadi tələb kardəşone

De Nardarani faciə əlağədar dəstqir bıə məhbison tale daima çe beynəlxalqə huğuğ mudafiə təşkilaton diğğətədey. Bı koədə bəşəri huğuğon mudafiəəkə, sabiğ məhbus Leyla Yunusi yolə xidmət hestışe. De çey rəhbərəti Az.R -ədə Siyasi Məhbuson Mudafiə Mərkəz fəaliyyət nişon dodə və de Avropa bəşəri huğuğon mudafiə təşkilaton sıft həmkarəti kardedə.

Im curə həmkarəti nəticəy ki, ısət Avropa cəmiyyət Az.R hokuməti bə ıştə şəhrvandon qətə divoniku xəbədoe və ım məhbuson tale ıştə nəzərədə oqətedə. Bə İşqəncon Əleyh Umumdınyo Təşkilati bə məhbuson işqəncə fakton qorə  Boku hokuməti beysurə hərəkəton məhkum kardəşe.  Human Rayts Votç, Emnesti İnterneşnl təşkilaton de Nardarani hadisə əlağədar dəstqir bıə məhbuson azadi tələb kardəşone.

Fevrali 10-minə ruji Boku Qonə Cinayəton Məhkəmədə "Mısılmonon İbemonə hərəkati" sədri müavin Elçin Ğasımov və çey həmməsləkon məhkəmə dəvom kardəşe. Məhbuson ifadə doəşone. Çəvonədə Lankonıjə məhbus İsa İbrahimovi votəşe ki, "Nardarani hadisə vaxti Kərbəloədə ziyarətədə bim. Noyabri 25 -ədə Nəcəf şəhərədə ım məhkəmə hanədə vindəme. Bə mı çand sor ko doeyən zınedəm. İm hadisonku 20 ruj bə peşt bə Vətən oqardim. Zınedəbim ki, mıniən dəstqir bəkarden. "Bandotdel"ədə bəmı doə həmə işqəncon həxədə qəp bıjənım mıni səfi hisob bəkayon. İ şəv  Əbəlfəzl ağa hanədə vindıme. Çey bədəno xun tıledəbe. Xəbəm se, votışe ə zulmon ki, bəşmə kardəşone, çey nəticəy."

"Azadlıq radiosu" xəbə doəşe ki, Siyasi Məhbuson Mudafiə Mərkəz bə ğərar omə ki,  de Nardarani hadisə əlağədar qıley hartərəfinə hesabati bə beynəlxalq ictimaiyyəti təğdim bıko.