Az.R -ədə İslamə Həmrayəti sorədən məciton rıjnidən

Az. R rəsmiyon daima ıştəni bənə İslami mənəviyyati hurmət kardə devləti bə dınyo ictimaiyyati təğdim kardedə. İm sorış İslamə Həmrayəti sor elan kardə, Bokuədə islamə hənəkon dəbəvunie, bəzi devləton vərzeşkaron xarcon bəştə qiy peqətəşe. Əmo əv ım cürə islampərvər siyasəti bəştə əhali nişon dodəni.

"Hədəf14.org" sayt xəbə dodə ki, Ağcabədi İcra Hakimiyyəti Ğarakənd di məçit rıjniəşe. Im məçiti inşa di sakinon de ıştə puli 3 sor bə nav bino kardəşonbe. İcra hakimiyyəti ımi ğeyri -ğanuni hisob karde və bı koy mane be səbəbiku tosə ısət məçiti inşa bə orəx rəsə nıbe. Şəvi nimədə bələdiyyə vığandə buldozeri çe əhaliku bexəbə məciti divon yeksan kardəşe. Rayoni rəhbəriyyəti de ım məsələ əlağədar hiç qıley məlumat doə nişe.

Bımi oxşəş qıley problem Masali şəhərədən heste. "Maide.az" bə "İslamazeri.az" sayti istinadən xəbə dodə ki, de şəhər rəsmiyon tələbi ponə sori Məhərrəmə manqi ərəfədə ım məçit de təmiri vonə dəbastışone. Bəhalinən bimi bə ğədərən ehtiyac nıbe. Isət məçiti kum oçıniəşone. Xeyli vaxte ki, əyo hiç qlıey ko şedəni, çimi səbəbi hiç kəsən izah kardedəni. Va -voş məçiti divoon vajnidə. Masali şəhəri icra hakimiyyəti bə sayti cəvob doə nişe. Ğəfğaz Misılmonon İdarən ım problemi izah kardedəni.

Boku hokumət bo İslamə Hənəkon dəvunie, bənə Kuveyt, Misir, Ezbəkiston, livani vərzeşkaron məsrəfi bə vırə rosnie ro de sa milyon dollari xarc kardedə, əmo bo Ğarakənd di mısılmonon ıştə dini tələbati icra karde ro qıley ibadətxonə nəinki dutedəni, hətto bımiro çəvon ıştən təşəbbüsi vəy sedə, çəvon de kom zəhməti inşa kardə məçiti rıjnidə. İlham Əliyev İslamə həmrayəti voteədə ıştə məmləkəti mısılmonə əhali məqəvuji nəzərədə qətedəni, qaspuən əvoni hiç mısılmon hisob kardedəni.