Nardarani hadisə məhbuson məhkəmə dəvom kardedə
Fevralə manqui 17-minə ruji Boku Qonə Cinayəton Məhkəmədə Mısılmonon İbemonə Hərəkati sədri muavin Elçin Ğasımov və çey həmməsləkon muhakimə dəvom kardəşe. Muttəhimon ifadə doəşone. Çəvonədə Seyfəddin Şirvanovi votəşe ki, de Taleh Bağırzadə çe əğıləti vaxtiku dust bıən.
Nardarani faciə bəpeştə - dekabri 8-ədə mınşon bə rolis şebə vanq karde. Şim. Çəyo mınşon bə "Bandotdel" barde, əyo bəmı votışone ki, ıştı kədə silah peydo kardəşone, az bə protokoli bəpe ğol bıkəşım. Əqər imtina bikom, jəqo çımı jeniən dəstqir bəkarden. Ramil Əliyeviən votəşe ki, "Bandotdel"ədə bey işqəncə doəşone. İ qılə cinayəti subut karde ro 2 nəfəri şoydiəti kifayət kardedə. Əmo 68 nəfər bəşmə votedə ki, bəmə içqəncə doəşone, bımi əhəmiyyət dodəniyon. Hakim Mayil Bayramoviən votəşe ki, de ım koy əlağədar bə Respublika Sər Prokurori muraciət bəvğande.
Çimi 3 ruj bə nav de Hacı Zulfuqar Mikayılzadə i vırədə 12 nəfər məhbuson mühakimən dəvom kardəşe. Vəkilon çe hakimi vədə vəsadət ros kardəşone ki, məhbuson şişə ğəfəso bekon, ə silahon ki, quya çəvon kəonədə peydo kardəşone, çəvon mənşə təhğiğ kardə bıbo, bə çəvon istehsal zavodon parseş bıvğandənən ki, de kom təşkilati sifarişi hozo karde muəyyən bıbo. Muhakimə de audio və video vasitə nıvışte icazə bıdon. Əmo hakimi ım vəsadətonən rədd kardəşe.
Məhkəmə fevrali 20-ədə dəvom bəkarde.
