İron və Rusiyə iğtisodi həmkoəti baxşədə tojə fəsl.

İron və Rusiyə iğtisodi həmkoətion mıştərəkə kamissiya iclos ki 2 qılə kişvəri iğtisodi baxşədə vey yolə hodisə bə hisob omeydə, de Rusiyə mizbonəti, bərpo bey holədəy.

Bə İran Peres aqentiyəti raporti əsos, tojədən İron və Rusiyə iğtisodi həmkoətion mıştərəkə kamissiya 16 minnə iclos rəsmi surəti, və de iğtisodi heyəton iyən ım kamissiya yolon iştiroki bino bıə.

İroni səmtiku İroni nati vəzir, Cəvad Oci iyən Rusiyə səmtiku çəy iminnə vəziri muavin, bənə nımuyəndəon, 2 qılə kişvəri həmkoətion mıştərəkə kamissiya yol bin.

Rusiyədə İroni nati vəzarətxonə ticari iyən beynəlxalğə muavin Əhməd Əsədzodə, bə İran Peresi jurnalist votışe: de İron və Rusiyə iğtisodi həmkoətion mıştərəkə kamissiya iclosi bərpo bey həmzəman, 10 qılə komitə icod bıə iyən 2 qılə vey muhimmə sənədon muzakirə kardey holədən.

Əsədzodə ijən təkidış karde: protokol və roy plani sənədon muzakirə kardey holədən və roy plani sənədədə İron və Rusiyə miyono həmkoəti mıştərəkə planon iyən həmmə məsələon de komilə detalon bəyon bıə ta de təyiin bıə hədəfi vositə, iğtisodi həmkoəti hevujəti bois bıbu.

İroni nati vəzarətxonə ticari iyən beynəlxalğə muavin ijən bəyonış karde: Rusiyədə 2 qılə kişvəri iğtisodi həmkoətion mıştərəkə kamissoyaədə, İron və Rusiyə miyono 2 tərəfi bumi Swift mığuvilə mıvzo həm co qılə vey muhimmə mıvzoonku be ki çəy barədə sıhbət bıə.

İroni kaştemoni cihod vəzarətxonə ticarəti bə inkişof rosniye muavin Muhsen Şiravənd həm bə İran Peresi jurnalist votışe: məntəğədə İron və Rusiyə bənə 2 qılə vey muhimm iyən təsirinə kişvər, ticari və iğtisodi mıbodiləon bə inkişof rosniyeyro ciddiyə irodə soybin.

Şiravənd ijən təsdiğış karde: kaştemon iyən şıtə məhsulonədə, İron və Rusiyə çı ticari mıbodiləon vey muhimmə baxşon soybin və ım baxş 2 qılə kişvəri iğtisodi həmkoətion hevujətiro vey muhimmə roli ifo kardeydə.