Rəyisi: xarıcion mıdoxilə bə Ğəfğazi məntəğə problemon əlovə bəkarde

İron İslam Respublika prezident de işorə bə ım ki Ğəfğaz məntəğə İroni mədəniyət, sivilizasiya və torixiku qıləy baxş bə hisob omeydə votışe: xarıcion mıdoxilə bə Ğəfğazi məntəğə problemon əlovə bəkay.

Bə İrna raporti əsos, Seşəmbə rujədə İron İslam Respublika prezident Sed İbrahim Rəyisi de Ermənistoni iminnə vəzir Nikol Paşiniyani 2 tərəfiyə votımoni bəpeşt, Səedabad nomo bıə torixi-mədəni mərkəzədə mıştərəkə mətbuatiyə iclosədə bəyonış karde: Ermənistoni iminnə vəziri səfər bə İron İslam Respublika, 2 qılə kişvəri inkişofin cəhəto, qıləy muhimmə məsələ bəbe.

Rəyisi işorəş karde ki dəvardə manqonədə İroni ticari rabitəon de Erməniston 43 faiz əlovə bıə, Əv əlovəş do: İron və Erməniston miyono ticarət bə 3 milyard dollar rəse de 2 qılə kişvəri irodəon əncom bəbe.

İron İslam Respublika prezident bəyonış karde: İroniro Ğəfğaz məntəğədə əmniyyət iyən sulh vey əhəmiyyətışe ijən təsdiğış karde: məntəğə məsələon həll kardey bəpe de həminə məntəğə rəsmi şəxson əncom bıbu və məntəğədə harcurnə xarıcion mıdoxilə problemon həlli əvəzi, bois bəbe muşkilaton ijən icod bıbu.

Rəyisi təkidış karde: Ğəfğazi məntəğə zərfiyəton karde bəzne ım məntəğədə sulh iyən stabiləti qarantiya bıko.

Im xəbəiyə iclosədə Ermənistoni iminnə vəzir Nikol Paşiniyan həm bə 2qılə kişvəri torixiyə rabitəon təkid iyən votışe: İron İslam Respublika karde bəzne multimədəniyət dini sulhomizə jimoni barədə qıləy şəffof və oşkoə simvol bıbu.

Paşiniyan ijən işorəş karde: İron və Ermənistoni rabitəon inkişofiro veyə zərfiyəton mucude və votışe: enerji, kaştemon, ovi mənbəon mudiriyət kardey iyən strukturon məsələon baxşonədə muzakirə əncom bıə ki bəpe ım muzakirəon bə nəticə bırəsi və təiin bıbu.