Hərbi iyən diplomatiya baxşonədə, Boku-İrəvani deşmonəti dəvom.

Ermənistoni mudafiə vəzarətxonə elanış karde ki zinə şəv, Azərbaycan Respublika hərbiçion de muxtəlifə silohon bə mıştərəkə marzi şərği baxşədə, Ermənistoni vırəon səmt, qullə ğandəşe.

Azərbaycan Respublika iyən Ermənistoni bə deyande ittihom jəy dəvomədə, Imruj cımə İrəvan bəştə marzi məntəğəon səmt, Boku hərbiçion qullə ğandeyku xəbəş do.

Bə Niyoz Armina aqentiyəti raporti əsos, Ermənistoni mudafiə vəzarətxonə elanış karde ki ım qullə ğandey cərəyonədə hiç qılə tələfot icod nıbıə və cımə rujədə və 8:30 saətiku  bə məhəlli zəmoni əsos,  muğəddəmə xətti vəziyət stabile.

Cımə rujədə həm Azərbaycan Respublika əmniyyəti sistemi iminnə muavin, Ceyhon Şadlinski iddioş kardə  ki bə Azərbaycan Respublika sərzəminon hərbi təchizaton ovoştoniye iyən Rusiyə sulh məromin sakin bey vırə şək-şobhəş heste.

Şadlinski de ım iddio ki Ermənistonədə bədxohon cəhd kardedən ta 2 qılə kişvəri miyono rabitəon normal kardey vəy bıqəton və həmçınin de işorəş bə İrəvani hərbi budcə əlovə bey, iddioş kardə ki Erməni tərəfo cəhd kardedə muxtəlifə kişvəronku inkişofinə hərbi təchizaton və silohon bıhıryon və har roy ki mumkine, sulhi təvafuğnomə imzo bə peş okıryon.

Həminə holədə diplomatiya baxşədə və de 2 qılə kişvəri əncom bıə cəhdon vucudi tosə bə ısət təvafuğon bə vırə rəsə ni iyən har kişvər co qılə kişvəri bə kam koəti mıttəhəmış kardedə.

Çoşəmbə rujədə Ermənistoni iminnə vəzir, Nikol Paşiniyan votəş be ki qırdə bemoni əmniyyəti peymoni təşkilatiku intizorım heste Ermənistoni sərzəminiku Boku hərbiçion təcili xarıc bey qarantiyaro, lozimə diplomatiya iyən siyasi koon vey rə əncom bıdə.