Siyasi Məhbuson Mudafiə Mərkəzi de Nardarani hadisə əlağədar ıştə hesabat elan kardəşe

De Nardarani faciə əlağədar dəstqir bıə siyasi məhbuson tale çe dınyo ictimaiyyəti diğğətədey. Im koədə Siyasi Məhbuson Mudafiə Mərkəzi xeyli zəhmətış heste. Im mərkəzi uzvon fevralə manqi 22-minə ruji de Nardarani hadisə əlağədar ıştə hesabat elan kardəşone. Im faciə əsas baiskaron, hokuməti bı koədə məğsədi barədə, istintağ və məhkəmə prosesonədə huğuği darıştə, həmən işqəncə fakton həxədə bə ictimaiyyəti müfəssəl məlumat doəşone.

«Amnesty International» beynəlxalq bəşəri huğuğon mudafiə təşkilatən həmonə ruji dınyo 159 qılə məmləkətədə bə insonə huğuğon vəziyyəti dair ıştə hesabat dərc kardəşe. Əyo  Az.R -ədə bə demokratiya məhdudiyyəton, bə azadfikrinə odəmon təzyiğ və təhdidon, bə məhbuson işqəncə doe barədə məlumaton hestin. Bı həxədən "Dəyərlər.org" sayti məlumat doəşe.

Boku hokuməti rəsmiyon bımi hələ ki, reaksiya doəşon ni. Əmo əvon ıştə repressiya siyasəti dəvom kardedən. "Azadlıq.info" xəbə dodə ki, REAL hərəkati fəal Rahim Şalıyev Sumğayit polisi tərəfo dəstqir kardəşone. Əyo bə çey sosial şəbəkədə nıvıştə stasuson qorə bey işqəncə doəşone, kuəşone, təhğir kardəşone. Çəyo Sumğayit şəhəri məhkəmə bey 30 sutkəninə həbs cəzo bıriəşe.

Az.R hokumət bə beynəlxalq təşkilaton tələbi məhəl nodəni, ıştə repressiya siyasəti dəvom kardedə.