Ermənistonədə Şəhid Suleymani xotirə yoqətey

Ermənistoni paytəxt, İrəvanədə İron İslom Respublika səforətxonə vırədə Qeneral şəhid Ğasım Suleymani 3minnə sorəqardış bərpo bıə.

Imruj Seşənbə Milodi 2023 minnə sor Yanvari 3minnə ruj və Hicri Şəmsi 1401 minnə sori Dey manqi 13 minnə ruj de İslomiyə İnğilobi Sepah təşkiloti Ğuds ğıvvə komandir Qeneral Ğasım Suleymani şəhodəti sorəqardış iyən muğaviməti beynəlxalğə ruji bərobəre.

Milodi 2020 minnə sori Yanvari 3 minnə rujədə, İslomiyə İnğilobi Sepah Təşkiloti Ğuds nomo bıə ğıvvə nakonə komandir, Sərdor Ğasım Suleymani qıləy holədə ki bə İraği rəsmi şəxson rəsmiyə dəvəti əsos bə ım kişvər dəvətış kardə be, Bəğdadi airporti nezədə Amerkəvıjə terrorist iyən mıtəcuvizə ğıvvon həvoiyə həmlə cərəyonədə, və de İraği milləti bəsici yoli muavin Əbuməhdi Əlmuhəndes iyən 8 nəfər çəy canqəkəyon bə ico şəhd bıə.

Bə İran Peres aqentiyəti raporti əsos, Ermənistonədə bıə İroni səfir, Əbbas Bədəxşan votışe: Qeneral şəhid Suleymani mıcohidəti royədə nomış məlum nıbıə iyən ış yolə şəhidi həmmə koon bə Xıdo əsos be, və har çi ki çəy zu be, Xıdo bəy əto kardəş be.

Bədəxşan Zuhuri ijən İron və Ermənistoni rabitəon barədə votışe: 2 qılə kişvəri torixi rabitəon vey ğoyme və 2 qılə milləti mənafe çərçivədə ım rabitəon hevuj bey holədəy.

İroni İslomiyə parlamentədə bıə İroni cənub Erməni məsihiyon nəmoyəndə Robert Beqleriyan həm votışe: İroni məsihi ictima Qeneral Ğasım Suleymaniro veyə ehtıromış heste.

Bə həminə raporti əsos, İrəvanədə Qeneral Ğasım Suleymani sorəqardışi mərosimədə, İroni İslomiyə parlamenti Erməni nımoyəndəonku çand nəfər iştirokışon be.