Bə Ermənistoni əleyh bəpe sanksiyaon təsdiğ bıbu.

Azərbaycan Respublika prezident beynəl xalğiyə təşkilatonku tələbış kardə ki bə Ermənistoni əleyh təhrim və sanksiyaon təsdiğ bıkən.

Bə Virtual.az internetiyə sayti raporti əsos İlham Əliyev Pakistonədə EKO təşkilati tojə iclosədə ıştə nıtğədə i tərəf beynəl xalğ təşkilatonku tələbış kardə ki Ermənistoni təhrim bıkən və co tərəf pidəş be ki Azərbaycan Respublika və Ermənistoni miyono həmmə ğətnoməon məxsusən sərhədiyə daveon barədə icra bıbu.

İlham Əliyev votışe: Əmniyyət Şura dəvardə 27 sori mıddətədə bo Ğərəboği bohran həll kardero 4 qılə ğətnomə təsdiğış kardə ki hiç qılə çəvonku icra bıə ni.

Azərbaycan Respublika prezident İslam Abadədə bıə EKO təşkilati ali rəsmion iclosədə ijən votışe ki Erməniston hejo bə Əmniyyət Şura, Avropa Həmkari və Əmniyyət təşkilat, Avropa Parlament, Avropa Şura Parlamentiyə İcma və co beynəl xalğiyə təşkilaton ğətnoməon həm əməl kardəş ni.

İlham Əliyev təkidış kardə: Azərbaycan Respublika ərazi təmamiyyət və kişvəri əmniyyət bə həminə ğətnoməon əsos bəpe təmin bıbu və jıqonə təşkilaton bəpe deştə təhrim və sanksiyaon bərobər Ermənistoni icburi sorətədə bə ğətnoməon əməl bıkə.

Pakistonədə EKO həmkari təşkilati i rujiyə iclos zinə bərpo be.